KUALA LUMPUR: Bajet 2018 ti deka dipejuraika ba bulan Oktober tu ila mungkur pengingin ati rayat di dikenataika nengah randau ini Transformasyen Nasional 2050 (TN50), pia ku Menteri, Datuk Seri Najib Tun Razak.
Ku iya, randau TN50 nya dikena mai ubah ungkup jemah ila, tang bisi mega sekeda pekara ti patut dipejalaika kitai diatu.
“Ambika chunto, ubah ti dipejalaika dalam bidang pelajar semina ulih dipeda ba 2, 3 rebak dudi ila,” ku iya maya sesi dialog TN50 enggau pengerami ngintu Hari Orang Indu bedau lama udah.
Sama bisi datai maya nya bini iya, Datin Seri Rosmah Mansor enggau Menteri Pemansang Orang Indu, Ruang Bilik enggau Raban Bansa, Datuk Seri Rohani Abdul Karim.
Najib ke mega menteri pekara wang madahka bisi berita sekeda manah ungkup raban indu lebuh bejuraika bajet nya ti dipelabaka kena 27 Oktober tu ila.
Ku Najib, Bajet 2018 digaga bepelasarka pemisi menua sebedau perintah ngaga pemutus ngemansutka sebarang belanja.
“Enti kitai deka nginsil GST ti mayuh dikena melanja guna rayat, kelebih ba program pengelandik enggau pengerai raban indu, nama agi utai ke uluh dikereja kitai deh ?” ku iya.
Nya kebuah rayat anang mudah arapka semaya penyakal ti deka nginsil GST, ku Najib.– Bernama
