Aum numbuhka Parti SEDAR dilanjar

Dato Othman Abdillah

KUCHING, Jun 19: Aum protem numbuhka Parti Sedar Rakyat Sarawak (SEDAR) ke deka diatur sehari tu dilanjar ngagai siti timpuh ke deka dipadahka.

Penengkebang, Datuk Othman Abdillah ngamatka nya lebuh ditanya pasal pekara nya sehari tu.

Ku iya, aum nya patut diatur jam 10 pagi di sebuah hotel ditu.

“Tajapia ketegal bisi pekara ti enda ulih diseliah, numbuhka SEDAR dilanjar sementara.

“Aum sehari tu dikinsil lalu dilanjar ngagai hari bukai,” ku iya.

Othman sebedau tu bisi bejaku madahka sida semina begunaka tujuh iku dikena numbuhka komiti protem tajapan sambut chukup manah.

“Aku bisi nerima kangau telefon ari Marudi, Sibu enggau Miri ke minta nyeretai komiti (protem) SEDAR,” ku iya.

Iya mega madahka berita sentang aum protem nya udah dikerembai ti ngujungka sida nerima bemacham respon nyengkaum ari piak bekuasa. — DayakDaily