KUCHING, Mac 30: Menteri ba Opis Menteri Besai Datuk Seri Nancy Shukri madah, tebal agi 13 pekara bekaul ngatur sereta mulaika kuasa ngagai Perintah Negeri Sarawak ti dipesetuju sebedau tu lanchar lalu bisi nya udah dikemujur.
Entara mulaika kuasa ti dipejalaika baka meri kuasa nitihka ‘Kanun Tatacara Jenayah’ ngagai pegawai undang-undang negeri ngambika ulih nawa ba penyalah ke dikereja nitihka Ordinan negeri.
Berebak enggau nya, Opis Imigresen Sarawak ditambah 100 pangku pengawa baru dikena nambahka pengawa neritka adat.
Nancy mega madahka, ungkup isu ngagih gis di Sarawak, nya deka dipejalai ari baruh Ordinan Ngagih Gis 2016 pengudah dikerandau enggau Opis Menteri Dagang Dalam Negeri, Koperasi enggau Bebeli Barang (KPDNKK).
Nancy dulu ari nya begulai enggau Menteri Luar Datuk Seri Anifah Aman nyadi chairman aum Komiti ‘Pemandu Pelaksanaan Penurunan Kuasa’ entara Perintah Besai enggau Perintah Negeri Sarawak sereta Sabah di Parlimen.
Isu mulaika baru kuasa bekaul elektrik sereta ngagih gis ngagai Sarawak enggau Sabah dikerandau sechara positif ba aum nya. — DayakDaily
