12 genturung pendiau di Bario deka dibekal ai beresi

Water. — DayakDaily.com file pic. // Photo: Pixabay

BARIO, Mac 30: Bisi 12 genturung pendiau dalam kandang menua Bario ditu deka nerima bekal ai beresi enda lama agi.
Pekara nya deka dikemujurka nengah pengerami nasih tanah Loji Meresi Ai Bario ba palan projek, Pa Umor ti dipenyadi Menteri Utiliti Dato Sri Dr Stephen Rundi Utom, empai lama udah.

Duabelas genturung pendiau ti deka ngasaika bekal ai beresi enti projek ngaga loji nya udah tembu ila iya nya Arur Dalan, Bario Lembaa, Arur Layun, Pa Ramapuh A enggau B, Bued Main Beruh, Ulung Palang Benah, Padang Pasir, Kampung Baru La Tumuh, Pa Ukat enggau Pa Umor.

Sapit Speaker Kunsil Negeri (DUN) ke mega ADUN Mulu Datuk Gerawat Gala meri terima kasih ngagai perintah negeri ti diiring Kepala Menteri Datuk Patinggi Abang Johari Tun Openg laban udah ngaga projek ti lama udah dianti peranak Bario nya.

Projek nya dipadahka kala disemaya niang Pehin Sri Adenan ti dikelala enggau nama “Maran Ribed” lebuh iya ke penudi endar nemuai ke Bario ba taun 2015 sebedau iya midang.

Gerawat lebuh ke bejaku ba pengerami nya madahka kandang menua Bario suah suntuk ai kelebih agi maya musim kemarau.
“Kapasiti enggau pemansut ai diatu enda tetangkupka guna peranak Bario ke majak nambah,” ku Gerawat.


Ku iya, nitihka padah Opis Menteri Utiliti enggau Opis Bekala Ai Menua Pesisir (JBALB), projek ai ti dilancharka nya ulih nyendiaka guna ai ngagai kandang menua nya ungkup 15 taun ke deka datai.

Projek ai beresi nya nguna ai ari sungai pemadu di Bario iya nya Sungai Depur. — DayakDaily