MUKAH, Jan 17: Malaysia diatu ba renggat ke penudi berunding enggau China ba pengawa nginsil tagang eksport sarang burung layang mata ngagai menua nya, ku Menteri Industri Betanam Betupi enggau Bumai, Datuk Seri Ahmad Shabery Cheek.
Ku iya, siti sempekat protokol udah disain opis menterian nya ngambika Opis Servis Veterinar dikearapka menua China untuk meresa nitihka prosedur operasi standard ti ditetapka ba sarang burung layang sebedau dieksport.
Iya dikerandau pemberita pengudah ngabas dua palan sarang burung layang enggau sebuah kompeni memproses ditu kena Hari Satu tu tadi, ti melabaka pemutus positif asil randau nya deka diulih dalam timpuh beberapa bulan agi.
Taja pia ku Ahmad Shabery, pekara nya nadai ngeruga pengemeran sarang burung ke udah diproses di menua tu ke bisi peminta tinggi ari China.
“Nitihka statistik kitai, sarang burung layang ke diproses sereta dieksport bisi 60 tan setaun tang penyampau ti dikeluarka urung 400 tan setaun.
“Reti nya udah mayuh ke dieksport tang nengah jalai bukai baka menua ketiga baka Hong Kong, Vietnam enggau ke bukai pengujung iya baru datai di China,” ku iya.
Iya mega madah, pengawa nyual nengah orang tengah nya ngujungka rega sarang burung nya baruh agi ari rega makit ke amat.
China nagang import ngagai semua produk sarang burung layang ari Malaysia kena bulan Julai 2011 sebedau matak pulai tagang ngagai sarang burung ke udah tembu diproses a bulan Jun taun siti nyin tadi. — DayakDaily
