Petronas deka nyerahka geran CSR ngagai perintah negeri

Petronas logo

KUCHING, Jan 17: Petronas deka nyerahka geran tanggungpengawa rama korporat (CSR) RM2 juta ngagai perintah negeri enggau Kepala Menteri Datuk Patinggi Abang Johari Tun Abang Openg dipelaba kena 3 Februari tu ila.

Geran nya deka disuaka pengari Petronas ngagai Kepala Menteri beserimbai enggau Hari Begulai Enggau Mensia Mayuh Terbuka Opis Menteri Pengintu Pengelantang Pendiau Komuniti, Orang Indu, Ruang Bilik enggau Pemansang Anak Mit (KWKPK) 2018 kena Feb 3-4 di Waterfront Kuching.

Menteri KWKPK Datuk Sri Hajah Fatimah Abdullah madahka geran Petronas nya deka diberi perintah negeri ngagai 224 organisasi enggau gerempung ukai dikuasa perintah (NGO) di serata Sarawak.

Tebal agi penerima nya organisasi enggau gerempung ti aktif ngaga aktiviti komuniti ke volunteer di serata Sarawak.

Bejaku ba aum media bekaul enggau Hari Begulai enggau Mensia Mayuh KWKPK 2018 di Baitul Makmur (MASJA) di Kuching, Fatimah madahka semina 12 organisasi enggau NGO nerima geran maya pengerami bejadi program nya nyadika simbolik, lalu ke laluh nya deka diberi pengudah nya.

Fatimah ngelaluka mensia mayuh ngulu program ti berambaika leka jaku “ Meniti Kesejahteraan Bersama” ke diatur pukul 7 pagi nyentuk 10 malam kena Feb 3-4 nya.

Bisi 41 bansal opis perintah enggau agensi perintah dibuka sehari nya nyengkaum nyendiaka servis bantu pengelantang pendiau, meresa dokumen setipikt pengada enggau kad pengelala, servis meri lalau ngiru anak, ngerejista e-kasih, program 1Azam enggau ke bukai. — DayakDaily