KUCHING, Mac 28: Pemujur sesiku nembiak dalam pelajar ukai semina dilempai ba sekula aja tang apai indai patut nyaup meransang anak sida belajar.
Menteri Muda Utiliti, Dr Abdul Rahman Junaidi madahka apai indai patut nentuka anak sida bulih pelajar ke chukup.
“Bala anak kita diajar bala pengajar di sekula, lalu tanggungpengawa apai indai meri sukung enggau peransang dalam bemacham chara maya anak bisi di rumah,” ku iya lebuh bejadi Perkhemahan Perdana ‘Program Motivasi dan Klinik UPSR’ Primari 6 SK Pulo di Masjid Darul Hana kemari.
Taja pan kiruh enggau pengawa tiap hari, iya ke mega ADUN Pantai Damai nangkan apai indai beratka pelajar anak sida.
“Tu meh tanggungpengawa apai indai ngagai bala anak dalam pelajar dikena nentuka sida teulihka pemujur” ku iya.
Ku iya, pengidup jemah ila tentu mar agi tj begunaka pemujur dalam bidang pelajar enggau pengelandik ngambika ulih ngerebut peluang kerja ti disediaka. — DayakDaily
