Allianz General Insurance Company (M) Berhad nyendia insuran ungkup rumah panjai

Uggah (bediri di tengah) begambar enggau Sawing (empat ari kanan) sereta Phang (kiba) ba penemuai raban nya.

KUCHING, Ogos 20: Peranak rumah panjai dilalau ngambi pelin insuran rumah panjai ke bisi disedia Allianz General Insurance Company (Malaysia) Berhad.

Mansutka jaku lalau nya, Sapit Kepala Menteri Datuk Amar Douglas Uggah madah kompeni nyendia pelin insuran nitihka bayar ke patut sereta nyendia program ke manah.

“Bayar premium setaun semina RM75 aja ungkup insuran penyampau RM10,000 alai pelin tu mungkur penusah angus enggau penusah bukai baka ke ampuh bah sereta pangka ribut.

“Pelin mega nyendia insuran ngagai tetiap iku peranak rumah panjai,” ku iya.

Uggah mansutka jaku nya lebuh nerima penemuai basa raban ari Allianz General Insurance enggau Pos Malaysia di Wisma Bapa Malaysia ditu, pagi tadi.


Insuran ke disedia nya diatur Pos Malaysia Berhad alai peranak rumah panjai ti keran deka ngulihka insuran tau ngusung ngagai opis Pos Malaysia ke besemak.

Tambah Uggah, kompeni nadai ngeletak sebarang penetap ke terit alai tebal agi peranak rumah panjai ulih ngambi insuran dikena ngintu pemaik reta tengkira sida.

“Tetiap iku peranak rumah panjai meseti bisi siti pelin insuran alai insuran nya sigi enda ngenataika pengerugi,” ku iya seraya beambika chunto kandang sitak DUN Bukit Saban bisi 94 buah rumah panjai.

Nitihka statistik ari Opis Bomba enggau PenyahPenusah Malaysia (JBPM) Sarawak, naka Julai 12, 2019 penyampau 12 buah rumah panjai di selampur Sarawak udah dituntung penusah angus.

Ba taun 2018, penyampau 24 buah rumah panjai angus lalu ba 2017 bisi 26 buah iya nya ke pemadu mayuh pengudah taun 2015.

Rikut mega ngayanka 70 peratus kes angus rumah panjai bepun ari sambung lektrik sereta 20 peratus ketegal pengilap di dapur.

Ba penemuai nya Pos Malaysia diarika Manager Sawing Bajing alai Allianz General Insurance diarika Eksekutif Pengelaku, Vera Phang Lee Ping. — DayakDaily