Ai Wong Jangkar enda likun sereta ditutup sementara, pengawa miring dipejalaika

Pengawa miring (minta ampun) ngagai utai ke dipechaya nguan palan nya benung dipejalaika.

KUCHING, Sept 18: Ai Wong Jangkar palan ti ngembuan rampa ti manah endur belepa kelebih agi maya ujung minggu.

Ai wong nya ke bebatu ngembuan ai chiru ti nyamai alai mandi sereta bebekiu kelimpah ngembuan angin ke beresi, sigi ditapat mensia mayuh sekali ari jauh enggau ke semak ngelingi nya.

Palan nya ke sepenyauh empat kilometer ari jalai besai, ulih dilawa nengah chara bedarat sereta niki bukit pengelama lebih sejam.

Taja pia, ketegal beberapa penusah ke udah nyadi ba kandang ai wong nya, palan nya udah ditutup sementara berengkah ari kemari.

Palan nya ditutup sementara laban meri awak ngagai pengawa miring sereta mgintu utai ti dipechaya bisi nguan endur nya, ngambika enda ngachau orang ti datai ngelantangka ati mandi tauka belepa dia dudi ila.

Berindik ari nya, nada sapa dikemendarka tama ngagai endur nya berengkah ari kemari.

Jaku tangkan tu nyemetak amat dikena nyaga pengelikun mensia mayuh ngambika enda betapi enggau sebarang penusah.

Bedau lama udah, kena Sept 10 tu tadi siku nembiak lelaki ke beumur 16 taun ti nitihka apai iya nguluka seraban orang mandi ngagai endur nya udah nadai ditinggang sepun kayu.

Penusah nya nyadi urung pukul 12 tengah hari itu, lebuh iya dipadahka benung ngenatka diri duduk ba atas sigi batu besai ke alai tanah di belakang iya tembu tumpur lalu nabanka sepun kayu runtuh di atas bukit tumbang lalu ninggang iya.

Nitihka pemadah, beberapa iku orang ke datai nyengkaum siku lutur mantu lalu mujur ngalihka kayu nya sereta ngeluarka nembiak nya ari endur iya ke ditinggangka kayu nya.

Lutur nya nguji ngubat sereta nyelamatka nyawa iya, tang nembiak nya disahka parai ketegal balat bakal dalam tubuh.
Sama bisi datai mantu maya nya, raban ari Balai Pengerara Api enggau Penyah Penusah (Bomba) Lundu.

Kelimpah ari nya, dalam bulan April taun 2015, dua iku bakih iya nya Mohamad Alif Hamzah @Umar enggau Ahmad Hafriz Marzuki ke sama beumur 27 taun mega udah nadai ba endur nya pengudah ke tegelinchir maya ngaga aktiviti ‘repelling’.

Nitihka riput, seduai tegelinchir endur ke pemadu tinggi dia lalu labuh ke dalam lubuk ti ngujungka seduai lemai.

Taja pia bangkai seduai mujur ditemu lalu dibai pansut ari endur nya nengah bantu ari raban bomba. — DayakDaily