KUCHING, April 17: Agrobank sedia bekerejasama enggau Opis Bekuasa Pemansang Koridor (Recoda) Sarawak sereta Opis Menteri Betanam Betupi Moden, Tanah Adat enggau Pemansang Kandang Menua negeri, ngelala bagi projek betanam betupi enggau dagang- agro ti ulih dikemansang baru tanah adat kelimpah ngangkatka ekonomi.
Presiden Ketua Pegawai Eksekutif Agrobank, Syed Alwi Mohamed Sultan ba sebengkah penerang madah: “Kami ngarapka oengawa tu meri empas positih ngagai sosio-ekonomi sereta muka pengawa puang lalu nempa pengaya ngagai orang bumai bekebun enggau orang dagang di Sarawak sereta mantu nuju eksport asil betanam betupi kita.”
Dulu ari nya, delegasi Agrobank ti betuaika Chairman, Tan Sri Mohamad Zabidi Zainal udah nemuai meri basa ngagai Yang di-Pertua Negeri Sarawak Pehin Sri Tun Abdul Taib Mahmud di Astana di Petra Jaya, ditu ke mega nyadi sebagi ari nemuai seraya gawa rabanopis bank nya ke Sarawak.
Syed Alwi madahka bank nya udah lama di Sarawak, kenyau ari muka pampang keterubah Bank Pertanian Malaysia Bhd di Kuching enggau Sarikei ba taun 1976.
“Diatu, Agrobank bisi nyauka 20,000 orang iku ke nguna servis bank nya di Sarawak ti mungkur empat segmen nya arj raban korporat, komersial, penguna enggau servis mikro. Kami meri servis ngagai sida nengah 13 iti pampang, lima kiosk, empat sukut agro, 51 ejen agro enggau 33 outlet ATM di serata negeri.
“Tebal agi ba sekeda pasar di Sarawak, semina Agrobank ke meri servis ngagai mensia mayuh, setipak enggan komitmen inklusif wang kami ke merj servis ngagai komuniti nyengkaum bala jauh din. Sentang kuing jemah ila, kami semampai ninjau deka ngerembaika bungkur operasi kami di Sarawak,” ku iya. — DayakDaily
