Adenan dikeingat ketegal polisi bepelasarka rayat

Sarawak Legislative Assembly Sitting, November 2017

KUCHING, Nov 15: Taja pan udah 10 bulan Niang Tok Nan (Tan Sri Adenan Satem) midang, tang iya agi dikingat ketegal ‘polisi bepelasarka rayat’ ti dikemeran lebuh iya ke agi nyadi kepala menteri Sarawak.

Asai nya nyata dipeda ba raban Dewan Kunsil Negeri (ADUN) (BN enggau penyakal) ke ngulu aum kunsil negeri.

David Wong (DAP-Pelawan) madah bantu ke pemadu besai reti ari Adenan iya nya meresa baru struktur tarif elektrik ungkup sektor domestik, komersial enggau industri dikena nampung penambah ungkus pengidup rayat.

Iya mega meri puji ngahai Adenan laban udah nginsil chukai tanah endur betanam betupi sereta tanah tanah endur diau ke meri empas besai ngagai rayat.

“Lebuh ke gawa nyadi kepala menteri, iya udah ngemujurka polisi talukka rayat. Iya udah ngambi ati (rayat Sarawak) kelebih agi ba kandang menua pesisir nengah chara baka nginsil tol jematan, ngerembaika pemansang ke besemak enggau pasar sereta ngurangka bayar premium ungkup tanah endur betanam betupi enggau alai diau.

“Nya meh chara ngiring ti keandalka rayat Sarawak lalu sida sedia meri kerejasama,” ku Wong lebuh bejuraika Bajet Negeri 2018 ba Aum Kunsil Negeri Sarawak kemari.

Wong dipeda nyata mandingka gaya iring Adenan enggau kepala menteri ke diatu Datuk Patinggi Abang Johari Tun Openg.

“Tang nengah iring kepala menteri ke baru, kitai nadai meda polisi nya agi,” ku iya.

Iya madahka Abang Johari nyata agi dipeda ngambi ati rayat nengah ekonomi digital enggau e-dagang, internet bepeneras tinggi, projek LRT enggau Sarawak Pay, tang iya enda ingat Sarawak begunaka perintah ke siru ngintu pengelantang pendiau rayat kelebih agi raban ti kurang benasit manah sebedau ngereja agenda bukai. — DayakDaily