Abang Johari: GPS kurang bepolitik, meratka pemansang menua pesisir

Abang Johari(tengah) ngengkah tapak jari ba skrin telefon pintar nyadika simbolik bejadi Bejadi Tiang enggau Servis Telekomunikasyen SMART 300 Luban Ulu. Bela dipeda Uggah(empat ari kiba)

Dikarang Chris Bishop

BETONG, 26 SEPT: Perintah Gabungan Parti Sarawak(GPS) meratkan program pemansang menua pesisir sereta kurang bepolitik.

Kepala Menteri Datuk Patinggi Abang Johari Tun Openg madah, enti pekara politik kelalu mayuh dalam perintah, rayat deka merinsa.

“Dalam kandang dua tiga hari ba menua tu bisi pekara ke enda tentu nyadi, iya nya berebut deka nyadi menteri besai.

“Ka napi pemerinsa rayat, udah ga ba musin Covid-19 diatu. Ba politik kitai meseti bisi etika,” ku Abang Johari.


Iya mansutka jaku nya ba Pengerami Bejadi Tiang enggau Servis Telekomunikasyen SMART 300 Luban Ulu, Spaoh seharitu.

Tambah Abang Johari, enti rayat udah meri kitai(perintah) kuasa semua bala ketuai meseti bekerja ungkup pengelantang rayat.

“Kitai udah ngatur pengeraja asal negeri tu enggau manah iya nya nitihka undang-undang sereta konstitusyen.

“Ba sentang minyak enggau gis aku ngelaban nitihka konstitusyen, pengujung iya kitai menang ba kort lalu bulih RM3 bilion ungkup rayat Sarawak.

“Nengah belanja penyampau nya, kitai ulih ngemansang kandang endur di selampur Sarawak,” ku iya.

Ngenang sentang tiang enggau servis telekomunikasyen ke dilanchar, Abang Johari madah peranak Bukit Saban udah bisi chara sereta perengka guna ke pemadu baru dikena ngatur ekonomi.

Inisiatif nyadika pengeran Perintah Sarawak dikena nyambung kelimpah ti ngurangka bida digital di menua pesisir sereta di kandang endur ke enda kena bungkur arus internet.

Dulu agi arinya, Sapit Kepala Menteri Datuk Amar Douglas Uggah ba jaku pengelalu madah tiang enggau servis komunikasyen nya mandangka pengeran Abang Joahri ti deka ngemansang menua pesisir.

Uggah ke mega ADUN Bukit Saban madah, tetiap projek ke udah disemaya tauka disebut sigi deka digaga ngambika tau meri pengelantang ngagai rayat. — DayakDaily