KUCHING: Taja pan ekonomi Sarawak manggai ba tikas ke chukup manah dalam taun 2016, tang kitai agi betapi enggau pemar ngangkatka ekonomi ngagai tikas ke tinggi agi ngambika ulih nyapai penatai pemisi ke tinggi sereta maju datai ba taun 2030, ku
Kepala Menteri Sarawak, Datuk Amar Abang Johari Tun Openg lebuh ke bejaku ba Gempuru Besai beserimbai enggau Ngintu Hari Pengada Tuai Megai Menua (TYT) Sarawak Ke-81 di Dataran, Kompleks Lumba enggau Main Sarawak pagi tu tadi.
Ku iya, KDNK Sarawak ba taun 2016 bisi RM113.6 bilion lalu dagang enggau menua luar beungkus RM116.3 bilion.
Tu meri pemaik lalu nengeri ulih ngetanka pemansang ekonomi ke positif ba penyampau 3.6 peratus dalam taun 2016, ku iya.
Kelimpah ari nya, penyampau eksport Sarawak ba taun 2017 mega bisi nambah lalu dipelaba ulih nyaup ngangkatka ekonomi nengeri ari 3.5 ngagai 4.0 peratus.”
Ku Abang Johari baru, taja pan gagit ngemansangka ekonomi nengeri ngambika ulih ngangkatka penatai pemisi rayat, tang kitai agi ngemajakka sekeda polisi ti ditengkebang Tun Abul Taib Mahmud, kelebih agi dalam bidang pelajar.
“Taja pan gagit ngemansangka ekonomi nengeri ngambi pulaika pemaik rayat tang sekeda polisi ti dipejalai Tun Pehin Sri Abdul Taib Mahmud agi dikemeran kelebih agi dalam bidang pelajar,” ku iya.
Pengerami nya pagi tadi bela digulu Tuai Megai Menua (TYT) Sarawak, Tun Pehin Sri Abdul Taib Mahmud enggau bini iya Toh Puan Sri Ragad Kurdi, Sapit Kepala Menteri Datuk Amar Douglas Uggah enggau Datuk Amar Awang Tengah sereta raban menteri kabinet nengeri enggau bala ketuai ke bukai
