Abang Jo enda kering, PH ulih menang ba empat penuduk, ku Chong

Chong (second right) speaking during the Pakatan Harapan Sarawak press conference today.

KUCHING: Chong Chieng Jen madahka Pakatan Harapan (PH) Sarawak ulih menang ba empat penuduk maya PRU Ke14 tu ila.

Iya bejaku munyi tu nimbal penerang ke dipansut Sekretari Besai BN, Dr Rundi ti madahka BN ulih ngerampas pulai empat penuduk ari penyakal ba PRU tu ila, empai lama udah.

Ku Chong ke mega chairman DAP nengeri, pemujur menang ba empat kerusi nya ila deka nambahka enam penuduk parlimen ke udah dipegai penyakal diatu.

Ku iya, PH diatu majak tegap lalu BN enda mega kering baka ke agi ari baruh iring niang Adenan sebedau tu.

Chairman BN nengeri diatu, Datuk Patinggi Abang Johari enda kering baka Adenan laban polisi ke dibai iya enda meri pemaik ngagai rayat, ku Chong ke mega chairman PH Sarawak ba aum media ke diatur ba Indu Opis DAP ditu, pagi tadi (20 Sept).


Ku iya baru, pengidup rayat diatu majak merinsa sekumbang ke ari baruh pegai BN pengudah PRU Ke13 suba,ke alai ungkus pengidup majak besai lalu pengawa makai suap majak nambah.

Ba awak nya mega Chong madahka Chairman Pakatan Harapan (PH) menua deka datai ke Kuching lalu meri licha kena 24 September tu.

Licha nya deka diatur ba palan paking kerita palan bebeli barang Everise BDC Kuching, berengkah pukul 7 lemai.

Ku iya program nya deka digulu bala ketuai PH ke bukai baka Lim Kit Siang (DAP) enggau Dr Hatta (Amanah).

Chong pechaya maya nya ila mayuh pekara deka dipekunsi Mahathir kelebih agi kebuah iya ningkilka diri ari UMNO sereta nyereta penyakal.

Nya mandang Najib udah ngiring menua nengah jalai ke salah lalu perintah ke diatu sigi patut ditukar, ku Chong.

Share this article!