Oleh Chris Bishop
KUCHING, 25 Oktober: Penyampau 78 iku tuai rumah panjai ba kandang menua Lubok Antu sepenemu mantah Majlis Pengurusan Komuniti Kampung Persekutuan (MPKKP) ditumbuh ba sitak Batang Ai enggau Engklili.
Nitihku chairman Komiti Ketuai Komuniti enggau Tuai Rumah Lubok Antu (KMKK), Pemanca Ja’au Jagit, pekara pemaik enggau pengelantang rayat udah mujur diintu Komiti Pengelikun enggau Pemansang Genturung Pendiau (JKKK) enggau manah ngelamatu.
“Nyema MPKKP nya ditumbuh, majlis tu semina deka mai penyarut ngagai peranak di rumah panjai. Kami bala tuai-tuai rumah panjai di kandang menua Lubok Antu endang mantah MPKKP ditumbuh ba kandang menua kami,” ku iya.
Ja’au mansutka penemu nya ba program gempuru begulai enggau 78 iku bala tuai rumah panjai di Dewan Pemanca Chua Teng Yew di Lubok Antu, seharitu.
MPKKP, ke dikelala nyadi Majlis Pengurusan Komuniti Kampung (MPKK), ditumbuh ngambi ulih ngemujur inisiatif nya di negeri Sarawak.
Tambah Ja’au, bisi sekeda rumah panjai di kandang menua Lubok Antu udah digusung orang ke dipadahka bisi kaul enggau pengawa numbuhka MPKKP tu.
“Raban tu bisi mai pom ngambi tau diisi diisi peranak rumah panjai. Tang kami enda nerima penatai sida lalu madahka enda besetuju enggau MPKKP ditumbuhka,” ku iya.
Ja’au pechaya MPKKp tau enda ibuh ditumbuh ketegal sistem JKKK ti bisi ngelamatu nyata udah bejalaika tanggungpengawa enggau manah sereta efektif ba atur mantu rayat.
Ba pengawa nya mega, Tuairumah Albert Kelinsing Manau madah, nyema tuju MPKK nya ditumbuh dikena mantu rayat, Perintah Besai Pakatan Harapan (PH) ulih mega meri bantu agih belanja nengah JKKK di tetiap rumah panjai.
“JKKK udah chukup manah sereta nyata ulih ngemujur mayuh bengkah aktiviti sereta mai mayuh pemaik ngagai nembiak redak.
“Enti sida (PH) amat keran deka mantu rayat, sida patut meri sukung ngagai JKKK tang ukai numbuhka sebuah agi organisasyen ke sama tanggungpengawa ba sesebengkah kandang menua,” ku Albert.
Iya ti ngarika Persatuan Tuai Rumah Zon 3 Ulu Batang Ai, madah MPKKP deka mambarka nembiak redak nengah penemu ke bebida.
Bela sepenemu enggau Ja’au sereta Albert, Pemanca Chua Kee Long ari Ketuai Raban KMKK bansa Cina, madahka penumbuh MPKKP tu enda meri pemaik.
Ku iya, MPKKP nya tebal agi deka mambarka penyerakup komuniti enda ngira bangsa Iban, Cina tauka Melayu.
“Pengari rayat kami iya nya Menteri Muda Beranakka Puku enggau Industri ke mega ADUN Batang Ai, Datuk Malcolm Mussen udah bebendar mai pemansang di kandang menua Batang Ai nyengkaum di semua rumah panjai.
“Iya udah meri mayuh Projek RTP/Projek Khas Rakyat sereta ngemansangka mayuh infrastruktur ungkup pengelantang peranak di rumah panjai. Nya alai, nadai kebuah kami nyukung MPKK ditumbuh,” ku iya enggau nyemetak.
Bela datai Pengulu Lembang ari menua Batang Ai Ili, Penghulu Chabi (Lemanak Ulu), Penghulu Inchang (Kesit, Engkilili) enggau Tuairumah David Ujan ti ngarika Persatuan Tuai Rumah sitak Ulu Engkari. — DayakDaily
