PUTRAJAYA, Jan 28: Bisi 70 buah kompeni bekaul enggau Program Inisiatif Ngenegapka Pemansang Komuniti (1MPAK) ngambika ulih muka peluang kereja ngagai nembiak ari menua pesisir, ku Menteri Pemansang Menua Pesisir enggau Kandang Menua (KKLW) Datuk Seri Ismail Sabri Yaakob.
Ku iya 1MPAK, ti betuaika Majlis Amanah Rakyat (MARA), udah mujur matak pengerindu kompeni ari industri ke tinggi rega baka servis dagang, elektrikal enggau elektronik, automotif sereta aeroangkasa sama enggau ngemujurka program nya.
“Kami netapka tetiap peluang kereja ke dibuka nya mayar gaji minimum RM1,500 sebulan,” ku iya ba aum media madahka pengawa bejadi 1MPAK ditu empai lama.
Ismail Sabri madahka nya sebagi ari program timpuh panjai MARA ti nagit urung kira-kira 250,000 pengawa puang diadaka dalam timpuh 10 taun ke deka datai.
Ku iya, ungkup renggat keterubah program nya deka nujah 26 pelilih menua ke dipilih.
Ku iya, keterubah 1MPAK berengkah kemari di Bera, Pahang ti mantaika bemacham aktiviti nyengkaum ngiga tipak kereja enggau interbiu, program dagang enggau pelajar.
Ku Ismail Sabri, program nya ukai aja muka peluang ngagai raban graduate diploma tauka ijazah tang mega meri peluang nggai nembiak ke bisi setipikit pengelandik. — DayakDaily
