KUCHING, Julai 10: Bisi 50 buah sekula repuk di Sarawak dilempai ba Opis Kereja Raya (JKR) negeri ngambika diangkatmanah tauka diseruri, deka tembu endar digaga opis nya ba bulan Ogos tu.
Menteri Kereja Raya, Baru Bian madah nya sebagi ari 116 sekula ke udah dikelala deka diangkatmanah, lalu opis nya udah bejalaika oebgawa enggau manah taja pan lubah ari pelin asal.
Ku iya, sekula ke lebih nya dilempai ba Opis Menteri Pelajar.
Bejaku ngagai pemberita pengudah ninga penerang sentang projek opis nya ba indu opis JKR Sarawak di Wisma Saberkas kemari, Baru madahka urung 210 buah agi sekula repuk dikelala ngambika diangkatmanah tauka diseruri di Sarawak udah tu ila.
Ku iya, agih belanja ungkup 210 buah sekula repuk nya engka deka dipasuk ari baruh bajet ungkup renggat dudi taun baru. — DayakDaily
