360 iku nembiak mujur nembuka Klinik Intensif Kecemerlangan SPM di UCTS Sibu

File photo for illustration purposes. — DayakDaily.com file pic. // Photo: Pixabay

SIBU, Okt 23: Menteri Muda Pelajar enggau Pansik, Dr Annuar Rapaee udah ngabas Klinik Intensif Kecemerlangan SPM di University College of Technology Sarawak ditu, empai lama.

Tukang Pengerembai Berita pengatur madah, tuju klinik tu laban deka meri latih intensif khas ngagai nembiak ke deka ngambi peresa pelajar Sijil Pelajaran Malaysia (SPM) bulan baru.

Program sepuluh minggu nya berengkah kena 13 Ogos lalu udah tembu rmpai lama, ti diseretai 360 iku pesereta.

Ku iya, seraban 45 iku pengajar pakar nyaup ngemur ngambika juluk program tu ulih dijapai.

Program ke diatur Gerempung Graduet Bumiputera Sibu bekerejasama enggau Palan Servis Kunsil Negeri (DUN) Nangka, udah empat kali diatur kenyau ari taun 2014.

“Program betuju ngangkatka peratus nembiak bumiputera nampung pelajar ke Institusi Pelajar Tinggi (IPT) kelimpah ngiri penemu tumu ngagai sida sentang konsep belajar di IPT, baka kuliah enggau tutorial,” ku iya.

Bisi urung 40 iku volenter Sarakup Graduet Bumiputera Sibu mantu ngemujurka program nya.

Mata pelajar ke diberi fokus iya nya subjek kritikal baka Matematik, Bahasa Inggeris enggau Sains ungkup aliran Sastera, lalu Matematik Tambahan, Kimia enggau Fizik ke aliran Sains. — DayakDaily