KUCHING, Okt 31: Menteri Pengatur Pengereja Pengawa Datuk Seri Richard Riot Jaem madah, nyentuk ujung Langgur Pemansang Malaysia Lumpar Kesebelas (RMK11), Malaysia deka muka 3.3 juta pengawa puang baru.
Ari penyampau nya, 60 peratus peluang kereja begunaka pekereja landik dalam bidang Latih Pelajar Teknikal enggau Vokasional (TVET).
Bejaku lebuh ke nutup Pekit Worldskills Malaysia Sarawak 2017 di Pusat Konvensyen Borneo Kuching (BCCK) ditu empai lama udah, Riot madahka TVET bidang ke beguna amat dikena Malaysia nyapai status menua maju bepenatai pemisi tinggi 2020.
Setipak enggau juluk nempa mayuh agi pengereja pengawa dalam bidang TVET, Bajet 2018 udah ngemendarka nyauka RM5 bilion dikena ngenegapka TVET, ke alai Opis Menteri Pengatur Pengereja Pengawa udah diberi tanggungpengawa bejalaika nya.
Bekaul enggau Pekit Worldskills Malaysia Sarawak 2017 keterubah endar diatur di Sarawak, Riot bedanji nganjung pengari ari Sarawak ngagai Pekit Worlds Skill (WSC) ke deka diatur di Rusia ba taun 2019.
WSC berengkah di Taipei ke alai Malaysia menang pekit nya ba taun 2015 di Brazil.
Ba pekito nya, tiga ari lima pesereta ari Sarawak udah nerima Medallion Excellence. — DayakDaily
