PUTRAJAYA, Jun 7: Menteri Besai Tun Dr Mahathir Mohamad saritu udah madahka 22 pemakai ti dijaga ari baruh Skim Kawalan Harga Musim Perayaan (SKHMP) Hari Raya Puasa 2018.
Entara pemakai nya manuk idup, manuk standard, manuk super (nadai kaki, pala, ati enggau lintan) sereta telu manuk gred A, B enggau C.
Sama bisi dalam ari baruh skim nya mega dagin chapi (tempatan), dagin chapi import, buah nyiur, nyiur parut, bawang merah, bawang mit India, bawang putih China, bawang besai import enggau ubi kentang import China.
Kelimpah ari nya, ikan kembung/mabung( berat entara tujuh ngagai sepuluh iku sekilogram), ikan selayang, ikan tongkol (dijaga ba Pahang, Terengganu enggau Kelantan aja) sereta ikan demudok/sagai/chermin/chupak (dijaga ba Sabah aja).
Menteri Besai mansutka penerang saritu madahka skim tu deka dipejalai berengkah ari 8 nyentuk 22 Jun ari Opis Menteri Dagang Dalam Nengeri, Koperasi enggau Pekara Bebeli Barang (KPDNKK) ba baruh Akta Kawalan Harga enggau Antipencatutan 2011.
“Timpuh bejalaika pengawa tu iya nya sepengelama 15 hari ungkup pengerami nya lalu deka berengkah dipejalai tujuh hari sebedau pengerami, sehari maya pengerami nya sereta tujuh hari sepengudah pengerami,” ku iya.
Dr Mahathir madah netapka rega maksimum udah digaga ba tikas renggat pemansut (ungkup manuk enggau telu manuk), burung enggau renchit dalam pusin pengawa ngidar nitihka pematut.
“Pekara tu digaga ngambika pengawa neritka atur ngemataka rega barang ulih dipejalai enggau manah lalu ngengkahka rega ti patut ungkup barang endang engkeman ke pemaik penguna sereta pedagang,” ku iya.
Ku Dr Mahathir, pedagang diansak nyual barang ke dikemata rega nya enda tau ngelui rega maksimum ti udah ditetapka perintah lalu meseti ngengkahka tanda rega khas bechura kalas ungkup barang pemakai nya dikena mida enggau barang bukai.
“Taja pia, pedagang diansak nyual barang nya baruh agi rega ari rega maksimum nyema rega ti diulih baruh agi,” ku iya nambah.
Dr Mahathir mega ngelalau pedagang iya nya sida deka ditinggang ukum nyema enda nitihka atur ari baruh skim nya.
Ku iya, sapa bagi pedagang ti ngelanggar atur deka ditinggang ukum ari baruh Akta Kawalan Harga enggau Antipencatutan 2011 lalu ulih ditinggang penalti nyema ditemu salah.
Ungkup penyalah nyual barang pemakai ti dikemataka rega ngelui ari rega maksimum, orang ti salah nya ulih ditinggang ukum mata duit RM100,000 tauka dijil enda lebih ari tiga taun tauka kededua nya sekali tauka mayar kompaun nyentuk ngagai RM50,000 tauka mayar kompaun nyentuk ngagai RM250,000.
Ungkup penyalah enda ngeletak tanda rega bechura kalas mega ulih ditinggang ukum nyentuk ngagai RM10,000 tauka kompaun nyentuk ngagai RM5,000 bagi orang siku-siku, lalu ungkup kompeni ulih ditinggang ukum nyentuk RM20,000 tauka mayar kompaun nyentuk ngagai RM10,000.
Dr Mahathir madah nyema bisi sebarang ripot tauka sebana ulih dipadah ngagai unit 1Malaysia One Call Centre (1MOCC) ba lumur 03-80008000, tauka telefon ngagai Pusat Informasi dan Gerakan Operasi Strategik (PIGOS) ba lumur 03-88826245/6088 tau mega nengah aplikasyen smartphone Ez ADU lalu emel ngagai e-aduan@kpdnkk.gov.my. — DayakDaily
