Wong enda ulih mutuska runding, nyemaka Dr M, ku Masing

Tan Sri James Masing

The English version of this article can be read here: https://dayakdaily.com/soon-kohs-attitude-is-as-indecisive-as-dr-ms-masing/

KUCHING, Jun 3: Presiden PRS Tan Sri James Masing nyemaka Presiden PSB Datuk Seri Wong Soon Koh enggau ulah ex-Menteri Besai Tun Dr Mahathir Mohamad.

Masing ke mega Sapit Kepala Menteri madah juluk ati ke suah berubah dipandangka ba pemutus Wong alai Parti Sarawak Bersatu (PSB) bisi netapka deka ngadu kerejasama enggau parti penyakal bukai tang pengudah nya madahka enggai.

“Kenaka 31 Mei, diriputka diak Datuk Seri Wong madah PSB sanggup ngadu kerejasama enggau parti penyakal bukai. Tang kena 1 Jun, diriputka diak iya (Wong) madah PSB enggai ngadu kerejasama enggau parti bukai.

“Dalam timpuh 24 jam, Datuk Seri Wong ngaga pusin ‘U’ lalu ngubah runding iya.


“Ulah ke suah ngubah pemutus nya ngingatka aku ngagai Tun Mahathir. Seduai baka ke udah enda ingatka utai sereta enda ulih mutuska runding,” ku Masing nengah siti penerang kemari.

Masing ke mega Menteri Infrastruktur enggau Pemansang Pelabuhan nambah enti ulah ke suah ngubah pemutusnya dikena ba atur netapka polisi, nya tau nunda pekara ke nyadi ba Pakatan Harapan (PH) alai polisi ke digaga seharitu tau diubah ila.

“Manah meh nya PSB diatu ngatika diri. Enti sida ngadu kerejasama enggau parti bukai, parti nya engka napi pemar ketegal pemutus ke digaga sehari tu, tau diubah ila,” ku Masing. — DayakDaily