SIBU, Jan 28: United People’s Party (UPP) kemari udah bejadi website E-Rejista UPP dikena ngemudahka pengawa ngerejista kaban baru ba sebarang maya.
Nya dilanchar beserimbai enggau pengerami mantaika kaban baru parti ti diatur ba Kingwood Hotel ditu, ti dipenyadika presiden parti ke mega Menteri Dagang Entarabansa enggau E- Dagang, Dato Sri Wong Soon Koh.
Wong madahka diri gagit endar enggau semua nya lalu beribu iku kaban udah direjista.
“Website nya deka ngemudahka mensia mayuh direjista nyadi kaban UPP sebarang maya enggau endur,” ku iya.
Wong, ke mega Menteri Wang Kedua minta parti bekerejasama sereta bebendar dikena nentuka teulihka pemujur ba PRU ke deka datai.
“Sebedau tu aku udah berandau enggau Menteri Besai Datuk Seri Najib Tun Razak enggau Kepala Menteri Datuk Patinggi Abang Johari Tun Openg seraya nyuaka nama chalun ke dikeandal ulih menang ba sekeda sitak.
“Mayuh kontroversi bekaul enggau chalun nya enggau ke bukai tang kitai enggai belaya enggau orang bukai pasal pekara nya.
“Kami udah nganjung nama chalun ke dikearap ulih menang ngagai Menteri Beaai enggau Kepala Menteri ngambika seduai ulih ngaga pemutus.”
Ku iya, dua iku chalun UPP ungkup sitak Sibu enggau Lanang iya nya Dato Andrew Wong enggau Andrew Ting, ti udah nengkebang pelin lima taun (Rancangan Sibu 1) (RS1) ungkup pemansang Sibu ari taun 2018 ngagai 2022.
Iya mega madahka pelin nya mungkur semua sukut berengkah pemansang Sibu, pemansang infrastruktur,pelajar, pemansang nembiak, rumah ke ulih dibeli, dagang temuai, perengka pengangkut mensia mayuh, pengerai mensia mayuh enggau environmen, pekara rama enggau servis komunit, e- dagang enggau betanam betupi.
Sama bisi ngulu pengerami nya kemari,mandal kanan Presiden UPP Datuk Tiong Thai King, Ketuai Nembiak Pusat ke mega mandal presiden Dr Johnical Rayong enggau sekretari besai George Lo. — DayakDaily
