Uggah ngelalau PBB Bukit Saban sedia napi PRN12

Uggah (kiba) sereta Sekretari Politik Kepala Menteri Dr Richard Rapu (tengah) mandangka menira GPS ba pengawa di Rh Francis Nyanggau di Betong kemari.

KUCHING, 19 Julai: Sapit Kepala Menteri Datuk Amar Douglas Uggah ngelalau kaban dalam Parti Pesaka Bumiputera Bersatu (PBB) pampang Bukit Saban nyikap diri napi Pengawa Bepilih Besai Negeri Ke-12 (PRN12).

Ku iya, PRN12 disadang diatur bebida ari pengawa ti udah ke alai mayuh prosedur operasyen standard(SOP) meseti dititih ketegal pengelekai Covid-19.

“Berindik enggau nya kitai meseti nyikap diri, deka ditukuka atur enggau prosedur ke baru ti meseti dititih ungkup pemaik pengerai semua.

“Tajapan pengawa bepilih nya berat, kitai enggai ngeruga pengerai sesapa,” ku Uggah.

Iya mansutka jaku nya ba sebengkah pengawa begelumu begulai enggau bala ketuai pampang ke diatur di Rh Francis Nyanggau di Penom, Betong kemari.

Uggah ke mega Chairman PBB Bukit Saban madah nengah SOP ke ditetap, bala kaban parti meseti nyaga takah penyauh 1 meter maya begelumu.

Iya ngasaika sebengkah kus patut diatur ngambi ulih dikena meri penerang sentang pekara ke ulih digaga enggau ke enda ulih.

Ngenang kaul ke sama, iya ngelalau kaban parti ngambi seruran matau sereta nemu pemar ke bisi ditapi rayat ba kandang endur sida.

Kelimpah ari nya ku Uggah, sida mega meseti nemu pejalai tetiap projek pemansang ke bisi diatur.

“Kepala Menteri Datuk Patinggi Abang Johari Tun Openg ngasuh kitai matau pemayuh bala nembiak menua pesisir ti udah nadai kereja ketegal pandemik.

“Nengah penerang ke disadung, bala ketuai ulih berundingka chara dikena mantu sida,” ku Uggah.

Ku iya nambah, bala ketuai mega meseti ulih nentuka pengundi deka terus nyukung perintah Gabungan Parti Sarawak (GPS).

“Penyakal deka mantaika mayuh isu, tang kitai deka majakka pengawa pemansang ngambi ulih nambah penatai pemisi rayat.

“Kitai keran ngemujurka juluk tu nengah program ubah iya nya pengawa betanam betupi chara moden,” ku Uggah. — DayakDaily

Share this article!