Terenak pengerindu ba sabjek STEM berengkah ari sekula primari — Manyin

Manyin (duduk tiga ari kiba) begambar bebala mayuh enggau bala nembiak ke bepekit ba SMQ 2019 di Universiti UCSI kampus Sarawak di Kuching ditu.

Dikarang Chris Bishop

KUCHING, Jun 17: Pengerindu ba sabjek sains enggau matematik meseti diperansang ari sekula primari, ku Menteri Pelajar, Sains enggau Pansik Teknologi (MESTR) Dato Sri Michael Manyin.

Iya madah pekara nya berat ngambika nembiak sekula enda napi sebarang penanggul belajar kededua sabjek ba sekula sekundari.

Kelimpah ari nya, Manyin mega pechaya pengerindu ke diterenak ari sekula primari tau nyaup nyapai tagit 60 peratus nembiak belajar sabjek Sains, Teknologi, Engineering enggau Matematik(STEM) ba pom 4.

“Sarawak diatu nyingkang ngagai Industri 4.0 alai penau ba sabjek STEM cukup berat.

“Diatu, semina 23.2 peratus aja nembiak sekula kitai ditu ngambi bengkah sabjek STEM ba sekula sekundari lalu mengkang jauh ari tagit menua ke ba tikas 60 peratus,” ku iya.

Manyin mansutka jaku nya rambau bejadi Kuiz Sains enggau Matematik (SMQ) Renggat Negeri 2019 ke diatur di Universiti UCSI kampus Sarawak ditu, seharitu.

Beambika chunto maya iya mengkang nyadi pengajar dulu suba, sekeda nembiak ke masuk pom satu ku Manyin enda nemu saut matematik, 5 didarab 5.

Berindik enggau nya iya ngelalau pengajar enggau apai indai meransang anak sida rinduka sabjek STEM berengkah ari sekula primari.

Ngenang kaul ke sama, Manyin mega madah Sarawak deka ngepunka pengawa ngajar sains enggau matematik ngena Inggeris berengkah Januari 1, 2020.

“Ba taun ke udah, opis pelajar negeri udah matih 400 iku pengajar ngambi tau ngajar sains enggau matematik ngena Inggeris enggau betul.

“Atur matih pengajar tu deka ditampung alai 3,000 iku pengajar deka dilatih udah tu,” ku Manyin.

Penyampau 303 iku nembiak ti ngarika 47 sekula di Sarawak bepekit ba SMQ 2019 alai renggat semifinal enggau final bela deka diatur seharitu.

Renggat keterubah dulu agi ari tu ke diatur di 27 pelilih menua mungkur 96 iti sekula, 98 tim enggau 3,000 iku nembiak sekula. — DayakDaily