KUCHING, Nov 17: Sapit Kepala Menteri Datuk Amar Douglas Uggah Embas ke mega Chairman Komiti Tanah Hak Adat Bumiputera (NCR) patut diberi awak ke panjai agi mutarka penanggul tanah Hak Adat Bumiputera (NCR).
Nya ngambika komiti ulih mutarka penanggul sereta bejalaika pansik ti mungkur semua sukut, ku iya.
Pekara tu ku iya, bekaul enggau ubah Kod Tanah di negeri tu.
Uggah mega madah ubah ba Kod Tanah NCR Pemakai Menoa enggau Pulau Galau nya dipelabaka ulih dibantai ba Aum Kunsil Negeri dalam bulan Mei taun 2018.
Iya madah munyj nya lebuh ke nutup jurai ungkup opis menteri iya ba Aum Kunsil Negeri ditu, pagi tadi.
Uggah ke mega Menteri Betanam Betupi Moden, Tanah Adat enggau Pemansang Kandang Menua madah, perintah negeri numbuhka komiti nya ngambi ulih berunding lalu meri langgur penemu ke pemadu manah kelimpah mutarka penanggul hak tanah adat bekaul Pemakai Menoa enggau Pulau Galau.
Komiti nya diseretai Datu Jaul Samion, Datu Ganie Ugay, Datu Thomas Akin Jelimin, Francis Johen Adam, Kilat Beriak, Ding Seling, Paul Raja enggau Salang Manjan ke nyadi sekretari.
Sekterariat komiti iya nya Majlis Adat Istiadat Sarawak lalu komiti kereja mansik empas pemutusan Kort Federal sereta mansik undang-undang sereta langgur ubah ke nemban. — DayakDaily
