Tegapka jaku menua sereta pelajarka jaku bansa bukai

Map of the world. — DayakDaily.com file pic. // Photo: Pixabay

LAWAS, Oct 24: Jaku menua nyadi penyanding ngagai sistem perintah ke lalu jaku dikena ngaduka atur pengawa, penemu enggau komunikasi menua, pia ku Sapit Kepala Menteri Datuk Amar Awang Tengah Ali Hasan.

Iya meransang rayat di negeri tu nguasa mayuh agi jaku ti nyadika kuasa pengering dikena belurus ubah ti enda ulih diseliahka ba dunya global diatu.

Ku Awang Tengah, jaku menua patut ditegap sereta ngerembai kenyau ari menua udah merintah diri pengelama enam dekad numbuhka Malaysia.

Tambah iya, rayat ari menua barat belajarka jaku Mandarin di China laban menua nya udah nyadi pusat ekonomi global.

“Sejarah mandangka jaku Jepun, Perancis tauka Jerman udah dipelajar orang bukai laban menua nya udah nyadi menua maju ke meri rega ekonomi ngagai jaku sida,” ku iya.

Awang Tengah ke mega Menteri Pemansang Industri enggau Orang Dagang sereta Menteri Pemansang Mengeri enggau Pengeraja Asal Kedua Sarawak madahka jaku Arab, dipelajar bala ‘ulama’ enggau intelektual ukai Islam ke ngiga penemu sains, teknologi, ngaduka pengawa, undang-undang enggau bidang intelektual sereta pakar bukai maya tamadun Islam dipeda tinggi.

Nya alai ku iya, besai amat reti nyukung jaku menua tang jaku nya meseti ngerembai jaku dinamik sereta relevan ba renggat menua enggau global.

“Barang bagi jaku ke tan statik berisiko nyadi enda relevan enti enda berubah nitihka ubah enggau pemansang di dunia,” ku iya. — DayakDaily