KUALA LUMPUR, Julai 25: Opis Menteri Pemansang Orang Indu, Ruang Bilik enggau Raban Bansa nagit ngambika semua ejensi perintah numbuhka Palan Nyeridi Taman Anak Mit (Taska) ba endur kereja perintah manggai ba bulan Januari 2019, kelebih agi ti bisi kaul enggau kereja syif.
Sapit Menteri Besai Datuk Seri Dr Wan Azizah Wan Ismail madah, opis menteri nya mega deka bekerejasama enggau Opis Menteri Pelajar ngambika Taska ulih ditumbuhka di sekula ngambika bisi dikena pengajar ti gawa.
Iya ke mega Menteri Pemansang Orang Indu, Ruang Bilik enggau Raban Bansa madahka perintah udah nyendia bemacham insentif dikena meransang pengawa numbuhka taska ba endur gawa nyengkaum meri subsidi RM180 sebulan ungkup yuran nyeridi siku anak ngagai pegawai ke bepenatai pemisi enda ngelui ari RM5,000 sebulan.
“Ungkup sektor pengaji peribit, insentif diseliah ari chukai tau dituntut ari perintah nitihka surat tesau Opis Asil Dalam Negeri ke haribulan Feb 15, 1996, ke alai diseliah ari chukai 10 peratus pengelama 10 taun ungkup ubah enggau ngemanah bangunan endur nyendiaka Taska,” ku iya ba sesi Tanya Menteri-Menteri di Parlimen kemari.
Iya nyaut tanya Siti Zailah binti Mohd Yusoff (PAS-Rantau Panjang) senrang atur lengkas opis menteri ba pengawa nyaga sereta ngemata palan nyeridi anak mit nyengkaum ba rumah diri ngambika tragedi ngemedis anak mit baka Niang Adam Rayqal Mohd Sufi enda nyadi agi.
Dr Wan Azizah madah, entara singkang ke tau diambi dikena nambahka pengelikun nembiak mit di taska iya nya ngelekatka kamera litar tertutup (CCTV) ngambika apai indai ulih matau nengah jauh nengah aplikasyen telefon pintar.
“Bisi 4,293 Taska ke direjista di serata menua nyentuk Jun taun tu. Nya alai pekara ti tau diperunding iya ngelekatka CCTV,” ku iya nyaut tanya tambah Siti Zailah sentang mekanisma mantau semua Taska perintah enggau peribit enggau silik agi.
Ku iya perintah mega deka mansik ngambi numbuhka standar kompetensi nyengkaum sukut pengerai, latih enggau pelasar pengelandik ti diguna sesiku penyeridi ngambika tau dikena oengemeran ba palan nyeridi anak mit. — DayakDaily
