Tan Sri Richard Malanjum Ketuai Akim Menua ke baru

A statue of Lady Justice. — DayakDaily.com file pic. // Photo: Pixabay

KUALA LUMPUR, Julai 12: Tan Sri Richard Malanjum malam ensana udah ngangkat sumpah nyadi Ketuai Akim menua ke baru berengkah kemari.

Malanjum, 65, nerima surat chiri ari Yang di-Pertuan Agong Sultan Muhammad V ba sebengkah pengerami di Bilik Singgahsana Mit, Istana Negara, ditu.

Pengawa nyuaka surat chiri enggau angkat sumpah pangku pengawa nya bela digulu Menteri Tun Dr Mahathir Mohamad, Menteri ba Opisn Menteri Besai Datuk Liew Vui Keong, Ketuai Sekretari Menua Sri Dr Ali Hamsa, Akim Menua Tommy Thomas, enggau Ketuai Pengerejister Kort Federal Datuk Seri Latifah Mohd Tahar.

Malanjum, ex-Akim Besai Sabah enggau Sarawak nyilih Tun Md Raus Sharif ti udah nganjung surat nyurutka diri nyadi Ketuai Akim Menua kena 31 Julai.

Malanjum diada kena bulan Oktober, 1952 di Tuaran Sabah, lalu besekula ba sekula primari enggau sekondari di Kota Kinabalu, Sabah.

Iya berengkah gawa Opis Pelajar lalu nangkanka nya ba sekeda opis perintah ke bukai.

Malanjum Bumiputera Sabah keterubah dichiri nyadi Akim Kort Tinggi, Akim Kort Apil enggau Mahkamah Akim Kort Federal iya kort ke pemadu tinggi di Malaysia.

Tembu pengawa ngangkat sumpah nya, Sultan Muhammad V kemudian nyuaka surat chiri ngagai Tan Sri Ahmad Maarop nyadi Presiden Kort Apil nyilih Tan Sri Zulkefli Ahmad Makinudin sereta mega surat chiri ngagai Datuk David Wong Dak Wah nyadi Akim Besai Sabah enggau Sarawak nganti Malanjum.

Md Raus dan Zulkefli nyurutka diri pengudah dikemendarka Yang di-Pertuan Agong kena 8 Jun tu tadi.

Umur pichin bala akim iya nya 66 taun. — DayakDaily