KUCHING, Nov 28: Kepala Menteri Datuk Patinggi Abang Johari Tun Openg, lebuh ke bejaku ba sebengkah pengerami di Bintulu kena Hari Minggu tu tadi, madahka Perintah Sarawak bisi dokumen ti mandangka hak ba pekara bekaul enggau tasik sereta tebing pantai negeri tu.
Ku iya, semua dokumen nya udah dibai Gabenor Inggeris ke London lalu pengudah 50 taun dokumen nya tau dibuka lalu ukai agi rasia nyengkaum Sempekat Malaysia 1963 (MA63).
Iya madah, Menteri Besai Datuk Seri Najib Tun Razak setuju enggau peminta hak Sarawak dipulaika ngagai Negeri Sarawak.
Berindik ari nya ku iya, Menteri Besai enggau iya empu udah minta sebengkah komiti ditumbuh lalu ketiga – tiga Sapit Kepala Menteri deka nyadi kaban komiti ari negeri tu, lalu di Kuala Lumpur pan bisi komiti tetinggi sida.
“Kitai bisi bukti ke tegap bepelasarka undang- undang ba tasik enggau tanah di negeri tu,” ku iya.
Pengawa ngulihka pulai kuasa bekaul tasik negeri enggau tebing pantai sepenyauh 12 batu nautika deka dipajakka nguna fakta ke diulih Menteri Muda Undang-Undang,Kaul Negeri Perintah Besai enggau Mantau Projek Sharifah Hasidah Sayeed Aman Ghazali begulai enggau tujuh iku luyar ti dianjung ke London sebedau tu. — DayakDaily
