KUCHING, Okt 22: Isu surat tesau ari Opis Sekretari Perintah Negeri ti nagang raban ketuai pupu bansa ngulu program ke diatur Perintah Besai Pakatan Harapan (PH) balat dibantah ketuai PH.
Disain Sekretari Perintah Negeri Tan Sri Mohamad Morshidi Abdul Ghani kena Okt 11, 2018, surat nya dianjung ngagai semua opis residen serata negeri.
Chairman PH Sarawak, Chong Chieng Jen ba aum pengarang berita di Kuching kena Hari Minggu tu tadi netapka pekara nya enda nitihka konstitusyen sereta digaga enggau nadai kebuah ti nyemetak.
Iya ke mega Chairman DAP Sarawak ngasaika surat tesau nya baka ke ngemeli raban ketuai bansa diserata negeri.
Berindik enggau nya, Chong minta Perintah Negeri meri basa ngagai raban ketuai pupu bansa lalu enda nginsil hak sida arika ngulu sebarang bengkah program Perintah Besai.
“Ketuai pupu bansa nyadi jematan penyambung entara rayat enggau ijinsi perintah, baikka nya Perintah Besai tauka Perintah Negeri.
“Ketegal nya raban ketuai tu patut enda ditagang betemu enggau pengari ari Perintah Besai, sebarang program bantu enggau pemansang ke diatur sigi ungkup pemaik rayat,” ku Chong.
Mantah surat tesau nya, Chong netapka DAP Sarawak sedia meri servis ba pekara undang-undang ngagai ketuai pupu bansa ti sanggup ngeriput pekara nya ketegal ti diasaika iya enda nitihka konstitusyen.
“DAP deka nyendia servis luya pechuma,”ku iya ke mega Sapit Menteri Dagang Dalam Menua enggau Pekara Bebeli Barang(KPDNKK).
Chong ke mega ADUN Kota Sentosa enggau MP Stampin madah surat tesau ke disadung ngagai semua ketuai pupu bansa nya mandangka Gabungan Parti Sarawak (GPS) nangi diri alah ba pengawa bepilih ti deka datai.
Sehari dulu agi ari nya, Chairman Parti Keadilan Rakyat (PKR) Sarawak Baru Bian ke mega ADUN BaKelalan enggau MP Selangau sepenemu enggau Chong lalu mantah surat tesau nya.
Netapka pekara nya enda adil ngagai raban ketuai pupu bansa, iya pechaya surat nya ngemuntan sida bejalaika tanggungpengawa.
“Enti ditagang betemu enggau pengari ari Perintah Besai PH, genturung pendiau engka enda ampit ngasai program pemansang enggau bantu ke disedia.
“Surat tesau nya nutup peluang sida ngenataika pinta enggau perambu peemansang,” ku Baru ba penemuai kereja ke Akademi Binaan Malaysia di Jalai Sultan Tengah, Petra Jaya ke Hari Enam.
Ngenang kaul ke sama, Kunsil Besai Parti Pesaka Bumiputera Bersatu (PBB) Dato Ahmad Ibrahim netapka surat tesau nya meseti dipebasa sereta dititih raban ketuai pupu bansa.
Iya madah sida dichiri sereta nerima elawin ninting bulan ari Perintah Negeri.
“Ukai Perintah Besai ke mayar elawin sida. Nambahka nya, Perintah Besai nengah ijinsi baka ke opis pemadah udah ngetuka bantu ke diberi ngagai GPS,”ku Ahmad.
Pengari PH ditu ku iya nambah mengkang mega nguna perengka guna ke diempu Perintah Negeri baka ke Dewan Suarah endur sida ngatur program lalu dipenyadi sida empu.
“Nama kebuah kami(GPS) meri pemendar? Tang pengudah sida ngepunka semua kelikuh tu, kitai nagang raban ketuai pupu bansa ngaul diri enggau program ke diatur PH Sarawak,’tandu iya. — DayakDaily
