KUCHING: Parti Sa’ati Rayat Sarawak (SUPP) nadai penanggul nyerahka rintai nama chalun ke deka enggau bediri minta pilih maya Pengawa Bepilih Besai Ke-14 (PRU14) ngagai Opis Penagang Ulah Makai Suap Malaysia (SPRM) ngambika diperesa, pia ku Presiden parti nya Datuk Dr Sim Kui Hian.
Iya ke mega Menteri Pengawa Berumah enggau Kandang Menua madah, nya sebagi ari prosedur standard ungkup sesapa aja chalun ke deka bepilih.
Iya mega madah, chalun ti dipilih SUPP sekali tu ngembuan standard ke manah.
“Nya prosedur standard ke ukai semina diperesa SPRM aja tang mega polis enggau opis Insolvensi,” ku iya.
Presiden Parti Rakyat Bersatu (UPP) Dato Sri Wong Soon Koh madah, atur meresa chalun ungkup PRU14 endang patut dikereja semua parti politik dikena nentuka chalun nya endang amat patut.
Ku Wong, semua chalun UPP ke deka bediri minta pilih udah diperesa.
“Kami (UPP) udah ngereja nya. Kami udah nganjung nama ngagai Menteri Besai (Datuk Seri Najib Tun Razak) enggau Kepala Menteri (Datuk Patinggi Abang Johari Tun Openg ),” ku iya.
