SUPP dipelaba ulih ngerampas pulai sitak Parlimen Sarikei

Sarawak United Peoples' Party logo.

SARIKEI: Parti Sa’ati Rakyat Sarawak (SUPP) dipelaba mudah agi ngerampas pulai sitak Sarikei ari DAP enti bisi sukung ari Parti Rakyat Bersatu (UPP) enggau chalun ti engkeman ba PRU ke deka datai.

Penganalisis politik pechaya, enti SUPP mantaika chalun ti siru sereta dikerindu rayat, nya deka ngemudahka agi peluang parti nya menang ba sitak nya.

Bepelasarka rikod maya pengawa bepilih nengeri (PRN) ke sebedau tu, penyampau undi majoriti BN ba kededua sitak DUN ke ari baruh Parlimen Sarikei, iya nya Meradong enggau Repok bisi 2,459 undi.

Chalun BN di Repok Dato Sri Huang Tiong Sii menang enggau majoriti 943 undi lalu Ding Kuong Hiing menang enggau majoriti 1,516.

Taja pia, presiden UPP Datuk Seri Wong Soon Koh nadai kala belalai madahka parti nya bisi ati deka bepilih ba sekeda penuduk ke asal ari kelia diempu SUPP.

Ba pengawa bepilih ke sebedau tu, Ketuai BN nengeri maya nya niang Datuk Patinggi Tan Sri Adenan Satem enggai enda pan nguna strategi chalun terus dikena nyeliahka penyarut entara kededua parti.