KUALA LUMPUR: Menteri Besai, Tun Dr Mahathir Mohamad, madahka Chukai Jual enggau Servis (SST) kurang nating rayat dibanding Chukai Barang enggau Servis (GST) ke dikena perintah ke sebedau tu.
Ku iya, ari sukut penyampau ke digumpul, SST semina ngumpul RM20bil ngagai RM25bil dibanding RM42bil ke digumpul nengah GST.
“Reti nya, rayat diselamat ari RM20 bilion laban kitai ngena SST,” ku iya madah ngagai pemberita pengudah nyadi chairman aum ketuai tetinggi Parti Pribumi Bersatu Malaysia (Bersatu) ditu, kemari.
Dr Mahathir mega nyangkal dawa ti madah kenu ku SST deka nikika rega barang laban mayuh barang enda kena chukai nya.
Ku iya, mayuh barang suba nya kena GST tang enda kena SST, ti ngujungka rayat nanggung tating ke lempung agi ari ke ngena SST.
Ku Dr Mahathir, GST dikena ngulihka pengaya, tang rayat mayar chukai ba barang ke diguna sida ninting hari.
“Nadai pengamat ti madahka SST deka nikika rega (barang) laban penyampau SST nua ukai 16 peratus tauka 10 peratus, bisi sekeda barang nya nadai kena SST lalu bisi nya semina kena lima peratus tauka 10 peratus bepanggai ba item nya,” ku iya.
Menteri Wang, Lim Guan Eng, sebedau tu madahka ari baruh sistem SST ke dikena baru, ungkup ba servis deka dichukai enam peratus lalu chukai jual ba penyampau 10 peratus, sama baka maya ke dikena suba sebedau GST diteritka kena 1 April, 2015.
Sentang bisi gerempung profesional ke enda lantang ati laban enda dibai perintah berandauka sentang rang undang-undang draf SST, Dr Mahathir madah, sida tau betemu enggau Majlis Penasihat Kerajaan (CEP) ngenatika sebarang perambu.
Taja pia, Menteri Besai madahka CEP udah suah betemu enggau irang ke bisi pemerat lebuh ke ngaga sebarang pemutus. — DayakDaily
