SRI AMAN, Nov 24: Projek Spital Baru Sri Aman meseti tembu digaga ba bulan Ogos 2019, ku Menteri Kereja Raya Baru Bian.
Jaku tesau nya ditujuka iya ngagai raban kuntrektor ti bisi kaul enggau pengawa ngaga spital nya.
Dipasuk dalam kategori ‘projek sakit’ Baru madah projek nya diatu manggai ba ikas 40 peratus tembu enti dibanding enggau 60 peratus ba perambu asal.
“Kebuah laun ketegal nadai orang gawa bepengelandik sereta tim kuntrektor ti enda nemu bejalaika projek,” ku Baru ba aum pengarang berita pengudah nemuai ngemata pejalai projek nya di Sri Aman sehari tu.
Iya ke mega MP Selangau enggau ADUN Ba’Kelalan madah Opis Kereja Raya (JKR) deka matau projek nya enggau terit.
Projek digaga nengah belanja RM176 juta lalu dikemendar digaga ba Atur Pemansang Malaysia Lumpar Ke-10.
Tembu jemah, Spital Baru Sri Aman deka bisi 108 iti katil lalu dikearap nyaup ngangkatka ikas pengerai peranak Pelilih Sri Aman.
“Spital lama enda ulih nangkup pinta orang begunaka servis berubat di pelilih tu,” tandu Baru. — DayakDaily
