KUCHING, 19 SEPT: Menteri Muda Nembiak enggau Lumba Datuk Snowdan Lawan pechaya nama Bujang Berani Datuk Awang Raweng deka seruran dikenang belama.
Ku Snowdan, Awang Raweng bansa Iban ke siku iya udah nerima Midul George Cross ti ukai semina ngarika Sarawak tang di selampur menua Malaysia.
“Taja pan udah nadai di bai umur tuai(ada 1929 di Skrang), nama iya tetap deka seruran dikenang belama.
“Awang Raweng tu meh siku bujang berani ke enda takut ka leka peluru sereta ngetan ka rambai jako “Agi Idup Agi Ngelaban” nyentuk ka saritu,”ku Snowdan lebuhka ngenang pemidang Awang Raweng di Sri Aman kemari.
Tambah Snowdan, pemidang Awang siti pengerugi ke besai sereta balat diasaika kitai ba Sarawak.
Ku iya, pemerani niang maya betachah enggau munsuh komunis di Kluang, Johor ba taun 1951 nyadi siti sejarah menua.
“Niang Awang ba maya nya betachah ngelaban 50 iku munsuh komunis kediri ketegal ti deka ngidupka siku soldadu British Private Griff Hughes ti bakal,” ku Snowdan.
Nusuika agi, Snowdan madah antara taun 1948-1960 iya nya ba jeman ‘Emergency’ menua Malaya, platun Iban Trackers nyengkaum Awang Raweng mega beperang ngelaban munsuh lalu ngujungka mai pengelikun ngagai menua.
“Awang Raweng meh siku Iban Trackers ke mai rita jelai nama bansa Iban ngagai perintah British di England.
“Niang suah di kangau ngagai Buckingham Palace betunga enggau Queen Elizabeth, Prince Philip pia mega Prince Charles,” tandu Snowdan. — DayakDaily
