KOTA KINABALU, Mei 12: Presiden Parti Warisan Sabah (Warisan) Datuk Seri Mohd Shafie Apdal dijangka ngangkat sumpah nyadi Kepala Menteri ke-15 baru malam tu.
Nitihka pemadah ari Istana Negeri, pengawa nya deka diatur ba Istana Negeri pukul 9 malam.
Ba Pengawa Bepilih Besai Ke-14 (PRU14), parti Warisan betuaika Mohd Shafie udah menang ba 21 kerusi lalu DAP enggau PKR sama bela menang ba enam enggau 2 kerusi.
Nengah pemujur Warisan, DAP enggau PKR nempa kerejasama tang empai ulih numbuhka perintah laban penyampau semina bisi 29 kerusi, kurang dua kerusi ngulihka majoriti mudah dikena numbuhka perintah.
Tang pemutus enam ADUN ari Barisan Nasional iya nya empat ari UMNO enggau UPKO (dua) nyeretai blok penyakal betuaika Warisan kemari ngenyukupka penyampau kerusi dikena numbuhka perintah Sabah nengah majoriti mudah.
Kena 10 Mei, Chairman BN negeri Tan Sri Musa Aman udah ngangkat sumpah nyadi Kepala Menteri Sabah ke-14 ungkup penggal keempat pengudah bekerejasama enggau Parti Solidariti Tanah Airku (Solidariti) betuaika Datuk Dr Jeffrey Kitingan nengah majoriti mudah 31 kerusi.
Berebak enggau nya, ku Mohd Shafie, iya dipadahka sechara rasmi ngangkat sumpah nyadi Kepala Menteri Sabah ke baru, di Istana Negeri, malam tu.
Mohd Shafie lebuh dikerandau pemberita di luar laman rumah iya sehari tu tadi madahka sida agi nganti pemadah ari Istana Negeri. — DayakDaily
