Chris Bishop
KUCHING, 29 Julai: Atur muka sekula sekundari enggau primari di Pelilih Kuching, Samarahan enggau Serian kena 3 Ogos ditangguh ngagai 17 Ogos 2020.
Sekretariat Komiti Penusah Ngenyit Negeri Sarawak (JPBNS) seharitu madah, pemutus nya bepelasarka penemu Opis Pengerai Negeri Sarawak sereta bela mendingka penemu pengari ari Opis Menteri Pelajar Malaysia sereta Opis Pelajar Sarawak.
“Berindik enggau nya, JPBNS ngaga pemutus diak atur muka sesi sekula ungkup 164 sekula sekundari enggau primari di Pelilih Kuching, Padawan enggau Samarahan ke dulu agi ari tu ditetap kena 3 Ogos udah ditangguh ngagai 17 Ogos 2020.
“Kelimpah ari nya, atur nangguh sesi sekula tu bela mungkur 25 sekula di Padawan enggau 24 sekula di Samarahan,” ku Sekretariat.
Nitihka penerang Sekretariat, atur nya mungkur nembiak primari 1 nyentuk ngagai primari 6 sereta nembiak sekundari ari kelas peralihan, pom 1 nyentuk ngagai pom 4 enggau pom 6 baruh.
“Ungkup kelas tadika, pom 5 enggau pom 6 atas, sesi besekula dipejalai baka ke selama,”ku Sekretariat.—DayakDaily
