KUCHING, September 15: Sarawak disadang bisi servis penerbai bilun menua pesisir (RAS) ke manah agi berengkah 2019.
Kepala Menteri Datuk Patinggi Abang Johari Tun Openg madah pekara nya udah disetuju ba randau iya enggau Menteri Pengangkut Anthony Loke kena Hari Lima tu tadi.
“Sarawak ngelalu pengeran Perintah Besai nengah Opis Menteri Pengangkut ti berunding deka nyendia RAS ditu.
“Pinta tu udah lama dikenatai Sarawak,” ku Abang Johari bejaku ngagai pemberita pengudah bejadi Program ‘World Cleanup Day’ di Kuching pagi tadi.
Berindik enggau nya, iya ngarap RAS tu deka mungkur kandang menua pesisir baka ke Ba’Kelalan, Bario, Marudi, Long Seridan sereta ke bukai.
Abang Johari mega minta RAS tu enda mungkur penerbai bilun komersyel baka ke ari Sibu ke Kota Kinabalu, Sibu ke Kuching, Miri ke Sibu enggau penerbai dalam negeri ke bukai.
Dulu agi ari tu, iya nya pengudah penemuai basa Loke ngagai Abang Johari di Komplek DUN, Loke besemaya deka ngangkatmanah RAS di Sarawak.
Ku Loke bejaku ngagai pemberita, penerbai bilun RAS deka ditambah lalu nyadang pengawa nya ulih dikemujur ba taun 2019.
Opis Menteri Pengangkut ku iya deka ngadu kerejasama enggau Perintah Negeri ba atur ngemansang sistem pengangkut langit di Sarawak.
“Sarawak begunaka servis penerbai bilun komersyel ke efisyen ketegal nengeri tu bisi potensyel ba pengawa dagang temuai, logistik enggau ke bukai.
“Aku pechaya sistem pengangkut ke efisyen ulih mantu ngangkatka ekonomi Sarawak,” ku iya. — DayakDaily
