Seraban 140 iku ketuai komuniti enggau bansa nerima Diploma ari Kampus INFRA Sarawak

Rina (dua kanan) nyain plak kelai bejadi Kampus INFRA Sarawak di Kota Samarahan seharitu.

Dikarang Chris Bishop

KOTA SAMARAHAN, Mac 25: Kampus Institut Pemansang Genturung Pendiau (INFRA) pampang Sarawak di Kota Samarahan dipenyadi Menteri Pemansang Menua Pesisir(KPLB) Datuk Seri Rina Harun seharitu.

Kampus Infra nya nyadi kampus kedua ditumbuhka KPLB pengudah kampus besai di Bangi, Selangor lalu deka meri peluang ngagai raban ketuai komuniti enggau ketuai bansa ngulihka latih pengelandik.

Kelimpah ari nya ku Rina ba jaku bejadi kampus, raban nembiak, orang indu sereta komuniti di menua pesisir Sarawak tau ngerebut peluang ke sama.

“Pengawa ngaga kampus tu nyadi siti inisiatif KPLB nyendia infrastruktur ke bekualiti dikena meri bantu ngagai program latih ungkup raban ketuai enggau komuniti di menua pesisir Sarawak.


“Aku pechaya kampus tu ulih nyaup juluk kitai ti deka ngangkatka modal mensia ungkup pemaik komuniti di menua pesisir sereta ngemudah perintah nyadung penerang ngagai rayat,” ku Rina.

Rina ba pengawa nya bela ngelalau raban ketuai komuniti enggau bansa nyerenih ‘profil’ genturung pendiau sida.

Ku iya, pekara nya berat ngambika perintah ulih ngatur program pemansang ungkup tetiap genturung pendiau.

“Penerang ke ba dalam ‘profil’ genturung pendiau nya deka nyaup KPLB nentuka bengkah infrastruktur ke diguna alai enti mengkang kurang, perintah deka ngaga,” ku iya.

Ba pengawa nya mega, seraban 140 iku ketuai komuniti enggau ketuai bansa nerima Diploma Profesional Pemansang Menua Pesisir Negeri Sarawak.

Sekeda ari raban keterubah ketuai komuniti enggau ketuai bansa ti nerima Diploma Profesional Pemansang Menua Pesisir Negeri Sarawak.

Raban tu ngarika Chairman enggau Sekretari Komiti Pemansang enggau Pengelikun (JKKK) ari 7 pelilih menua iya nya Kuching (21 iku), Samarahan (15), Asajaya (15), Serian (40), Sri Aman (30), Pelilih Mit Pantu (9) enggau Pelilih Mit Lingga 10 iku penyereta.

Semua penyereta tu udah ngambi latih berengkah ari 4 nyentuk ngagai 25 Mac 2019 alai program diatur nengah kerejasama Universiti Kuala Lumpur (UniKL).

Sida nyadi raban keterubah ngulihka latih di Kampus INFRA Sarawak pengudah dibuka kena 16 November 2018 tu tadi.

Kampus INFRA pampang Sarawak sebengkah projek pemansang ke digaga nengah belanja RM55.6 juta ba tanah pemesai 7.858 hektar di Kota Samarahan ke disengkaum dalam Atur Pemansang Malaysia Lumpar Ke-10 (RMK10).

Bela datai Ketuai Sekretari KPLB Dato Dr Jailani Muhamed Yunus, Sapit Sekretari Perintah Besai(Sarawak) Norizan Jeli enggau Direktor INFRA Dato Rubiyah Abd Rahman. — DayakDaily