KUCHING, Nov 6: Perintah Negeri deka nanggung ungkus ngaga Jematan Batang Lupar ke diriput begunaka belanja RM1 biliun.
Sapit Kepala Menteri Tan Sri Dr James Masing madahka pia pengudah Perintah Besai ke baru, Pakatan Harapan (PH) enda netapka sebarang pemutus sentang pekara nya.
Perintah ke dulu, Barisan Nasional (BN) udah setuju bekunsi ngeluarka belanja 50:50 ungkup projek nya.
Nengah komitmen nya Perintah Besai ngeluarka belanja RM500,000 lalu Perintah Nengeri bela ngeluarka RM500,000.
“Siti pekara ke ngasuh aku ensiban iya nya sentang semaya Perintah Besai(BN) ke dulu. Perintah PH ke diatu patut bebasaka semaya nya alai ungkus projek Jematan Batang Lupar dikunsi 50:50.
“Tang sida (PH) enda kiruhka semaya nya, lalu ketegal nya kepala menteri kitai netapka pemutus diak Perintah Negeri deka ngeluarka semua belanja,” ku Masing.
Iya mansutka penerang nya lebuh dirandau pengudah tembu Aum Dewan Undangan Negeri (DUN) Ke-18 ba hari keterubah semalam (Nov 5).
Ba aum nya Kepala Menteri Datuk Patinggi Abang Johari Tun Openg mantaika perambu Bajet Negeri 2019.
Bajet Negeri 2019 ngagihka belanja penyampau RM11.914 biliun alai RM9.037 biliun tauka 76 peratus ungkup program pemansang lalu laluh RM2.841 biliun (24 peratus) ungkup belanja operasyen.
Nitihka penerang Abang Johari, penyampau RM6.049 biliun iya nya 67 peratus ari belanja pemansang deka dikena ngemujur projek pemansang di menua pesisir.
Ngenang kaul ke sama, Masing ke mega Menteri Pemansang Infrastruktur enggau Perengka Pengangkut madah kelimpah jematan, projek jalai tebing tasik enggau ‘Jalai Besai Ke-2’ deka mega dipelanja Perintah Negeri.
Tajapia ku iya, projek nya enda disadang tembu ba taun 2019 lalu begunaka timpuh 10 taun.
“Kitai mupuk nembuka semua projek lalu bepelasarka bajet diberi ninting taun. Semua projek jalai enggau jematan dikuasa opis menteri aku,” ku iya.
Masing mega netapka diak pejalai terus ari Sematan nuju Miri iya nya projek jalai tebing tasik disadang tembu dalam timpuh kurang ari 5 taun.
Ku iya, sebedau taun 2025 jalai tebing tasik ari Sematan nuju Miri deka tembu lalu jalai Sibu ke Kapit ulih ditengah ba 2020.
“Jalai Sibu ke Kapit tembu ba suku ketiga 2020 alai kitai udah bisi agih belanja dikena nembuka jalai ‘missing link’ nya,” tandu Masing. — DayakDaily
