KUCHING: Ari 3,282 iku lutur ke gawa di nengeri tu, semina 70 peratus ari nya peranak asal nengeri, ku Pengarah Yayasan Sarawak Azmi Bujang.
“Pengurang lutur dianggar 4,350 iku. Perintah nengeri keran deka ngangkatka 70 peratus peranak Sarawak nya ngagai peratus ke lebih tinggi ba awak ke semak,” ku iya.
Ku Azmi, Sarawak begunaka 7,282 iku lutur ngambika setipak enggau nisbah menua, nengah populasyen ti dipelabaka sepenyampau tiga juta iku nyerumba taun 2020.
Ku iya, perintah nengeri serius berati seraka penanggul tu sereta udah ngakun pengurang lutur nyadi sebengkah bidang ti dikemerat ari baruh sektor kualiti pelajar enggau modal mensia nengah komiti kabinet ungkup prestasi enggau transformasyen meri servis.
“Komiti tu udah ngaga pemutus guna numbuhka sebengkah program dikena matih mayuh agi nembiak khas perubat kelimpah perintah besai ngambi nembiak perubat selama,”
“Reti nya, perintah nengeri deka nyendiaka skolarsip dalam bidang tu ” ku iya.
Nyadika pengemun ku iya, perintah negeri udah meri skolarsip ngagai 40 iku nembiak ke ngambi program perubat Universiti Malaysia Sarawak (UNIMAS).
“Pengudah graduate sereta dilatih, bala lutur tu meseti kereja di nengeri tu ungkup timpuh minimum pengelama 10 taun,” ku iya.
