SIBU, Mei 2: Sitak Parlimen Selangau tentu deka matak perati ba Pengawa Bepilih Ke-14 (PRU14) tu.
Sitak nya deka diperebut dua iku luyar, Rita Sarimah Insol, 57, ngarika Parti Rakyat Sarawak (PRS-BN) enggau Baru Bian (PH-PKR) ti tebilang mayuh mutarka kes kort bekaul enggau Tanah Adat Bansa Asal (NCR) ti ditegika iya dikena nyaga bansa Dayak enggau negeri tu.
Baru, 59, Kaban Kunsil Negeri Ba’ Kelalan ke mega Ketuai PKR deka nguji, siku orang bansa Lun Bawang nguji nguasa kerusi majoriti bansa Iban.
Sitak Parlimen Selangau mungkur dua sitak kunsil negeri iya nya Tamin enggau Kakus ke bela dikuasa PRS.
Sebedau tu sitak Selangau ari baruh pegai Datuk Joseph Entulu Belaun, sebedau iya ditingkil ari parti kena 15 April tu tadi.
Ku Baru, iya dikangau bala ketuai PKR menua nya ke Selangau. Dianggarka lebih 300 iti kes kort nganti dipechara di serata negeri ke tebal.ahi ari kandang menua nya.
Presiden PRS Tan Sri James Jemus Masing keterubah mantah iya lebuh madahka Baru nadai nasit manah di Selangau laban 96 peratus ari 30,026 pengundi ke berejista nya bansa Iban.
“Iya orang datai, enda nemu jaku Iban, enda nemu penanggul rayat tang dikangau bediri minta pilih ditu,” ku Masing.
Majang Renggi, kaban Kaunsil Besai PRS ke mega ADUN Samalaju madahka Baru deka nyungkit dua pekara.
“Keterubah pemutus ningkilka Entulu enggau pemantu iya Andriana Chumang Nyabong. Penyukung sida agi ringat enggau pekara nya ti ngujungka sida nyukung Bian. Kitai meseti ingat Entulu ditu udah nyadi penyandang pengelama tiga penggal.
“Kedua, Baru tentu nyadi perati mayuh kes kort ke bekaul enggau tanah NCR. Iya taja pia nyadi siti ‘chap’ enti nyebut pasal isu nya sereta udah suah ngarika sida dua,” ku iya.
Majang mega madah, jalai pengarap mega tau meri empas ba PRU ke sekali tu laban Baru pengelicha ti dipebasa ba Sidang Injil Borneo (SIB) tauka denomasi Borneo Evangelical Mission Christian. Bisi urung 700 iku ke megai pengarap nya ba sitak Kakus.
Siku agi kaban Kaunsil Besai PRS ADUN Wilson Nyabong madahka parti nya deka nguji ngambi ati penyukung Entulu ngambika nyukung BN laban ngelama tu sida endang penyukung kuat BN.
“Sentang tanah NCR, kami deka ngagauka orang ke landik pasal pekara nya ngambika nerang ngagai rayat ke alai perintah negeri bisi inisiatif kediri mutarka isu nya lalu ukai meri akun ngagai sida.
“Ambika chunto, ubah ba Undang-Undang Tanah Negeri ba aum DUN bulan Julai ke deka datai.
“Ubah nya asil randau raban profesional Dayak enggau raban ke landik lalu perintah deka meri definisi sereta ngakun ke manah agi ngagai komponen ke beguna amat ba tanah NCR baka ‘Pemakai Menoa’ enggau ‘Pulau Galau’,” ku iya.
Ba Rita, 14 bulan keterubah nyadi pengepun ti balat ngasuh lelak taja pan puas ati lebuh iya enggau laki iya mujur ngabas 800 buah rumah panjai di Selangau.
“Aku engka agi baru dalam politik tang nengah penemu nya, aku meretika pemesai guna gawaka rayat enggau manah. Enda ngira sekalika nyadi Datuk tauka bisi penuduk tinggi enti deka ngereja pengawa nya. Kitai meseti bisi ati enggau pengeran,” ku iya.
Rita siku penyanding penemu undang-undang ba Bintulu Port Holdings Berhad sebedau pinchin lima taun ke udah. Dulu ari nya, iya nyadi majistret pengelama 5 taun.
Ku Rita, iya berengkah ngansah pengelandik nyadi ketuai lebuh nyadi Ketuai Sarakup Indu Dayak Sarawak (SIDS) pampang Bintulu pengelama 17 taun. Diatu iya Sapit Presiden Penanam Sawit Sarawak (DOPPA) ti meransang bansa Dayak nyadi pekebun mit sawit. — DayakDaily
