KUCHING, Okt 22: Opis Mekal Ai Menua Pesisir (JBALB) Sarikei bisi ngeluarka notis ngagai mensia mayuh ti madahka sekeda kandang endur dalam Bagi Menua deka napi penanggul ai berengkah ari Oktober 23-24, pukul 9 malam nyentuk 5 pagi.
Nitihka penerang ti dikeluarka JBALB Sarikei, penanggul nya nyadi ketegal pengawa nyambung paip baru ba dua endur di Jalai Bulat ti deka dipejalaika kontraktor Lebuhraya Pan Borneo.
Ku penerang nya, nyema gaya hari enda manah ba timpuh enggau ke udah ditetap, pengawa nya deka dipejalaika ba hari nangkanka nya ba jam ke sebaka ti udah ditetapka.
Kandang endur ke deka napi penanggul tu baka di Jalai Jakar, Jalai Meruton, Jalai Sare, Jalai Jakar ke Sebangkoi, kandang menua Sg Paoh, Jalai Bayong, Jalai Kim San, Jalai Wan San San, Jalai Tong San, Jalai Chung San, semanjai Jalai Bulat,kandang Jalai KJD Meradong, kandang menua Bintangor, Bukit Papit,Sg Sian, Selidap, Skim B enggau kandang menua Pakan.
Kandang endur bukai ke nadai dirintai dia mega dipelaba deka betapi enggau kesuh ai ke baruh kelebih agi ba kandang endur ti tinggi.
Taja pia, JBALB Sarikei udah ngelalu kontraktor ngenyampatka kereja nyambung baru paip nya, ngambika ulih ngurangka timpuh nadai bekal ai nya.
Berindik ari nya, mensia mayuh ke diau ba kandang endur ke dirintaika tadi, dilalau naruh ai ngambika bisi bekal ai ke chukup sekumbang timpuh kereja nya dipejalaika.
Penerang silik sentang pekara tu tau ditanya ngagai JBALB Sarikei nengah lumur 084 657980 tauka 084 657990. — DayakDaily
