Dikarang Chris Bishop
KUCHING, Mei 29: Pemantu khas Opis Menteri Kereja Raya, See Chee How madahka raban kuntrektor projek Jalai Besai Pan Borneo(PBH) deka nentuka jalai ke benung digaga nya likun ditengah maya musin pengerami tu.
Iya ke mega Kaban Kunsil Negeri (Adun) Batu Lintang madah tusun pengawa udah digaga ba tetiap pakej jalai rambau pengerami Hari Gawai enggau nangkanka nya Hari Raya.
“Semua jalai ke belubang deka ditutup lalu deka dipantau raban kuntrektor nyentuk ngagai maya kededua pengerami tembu.
“Kitai deka nentuka pejalai mensia mayuh ti betengahka jalai likun,” ku iya bejaku ngagai pemberita pengudah ngulu Pengerami Iftar Ramadhan Balai Bomba Batu Lintang ditu, seharitu.
Ketegal Jalai Besai Pan Borneo benung digaga, See ngelalau mensia mayuh jejimat maya betengah jalai alun, pulai ke menua diri.
Lebih 100 iku kaban Balai Bomba Batu Lintang ngulu pengerami.
Bela datai Direktor Opis Bomba Sarawak Khirudin Drahman enggau bala ketuai balai bomba bukai. — DayakDaily
