KUCHING, Nov 22: Sarawak ngembuan mayuh pengereja pengawa biak ke produktif sereta ulih bejaku dalam jaku Inggeris enggau manah, pia ku Kepala Menteri Datuk Patinggi Abang Johari Tun Openg.
Ku iya, negeri tu mega ulih nyendiaka pekereja biak ti bepelajar, landi sereta jelan landik dikena ngisi gaya dagang ke nguna teknologi tinggi.
“Sarawak ngembuan endur gawa ke likun sereta beresi. Tikas pengidup mega udah jauh manah agi kenyau ari dua dekad ke sebedau tu lalu pemeranak puku ari menua luar enggau sida sebilik ditukuka ngembuan jalai pengidup ke bekualiti tinggi.
“Nengah semua perengkaguna enggau penyikap moden, temuai ari menua tasik nadai penznggul nelebaka diri enggau raban bansa sereta jalai pengidup ditu,” ku iya bejaku ba Pengerami Bejadi WIEF Ke-13 ba Palan Konvensyen Borneo Kuching (BCCK) ditu kemari.
Ku iya, Sarawak dalam timpuh beberapa taun ke sebedau tu udah ngeletakka diri entara palan beranakka puku ti dikerindu di rantau Asia Tenggara (ASEAN).
“Lebuh mayuh menua bukai di dunya betapi dnggau pemar geopolitikal sereta krisis bekaul mensia, Malaysia kelebih agi Sarawak ulih ngetanka pengelantang enggau pengelikun,” ku iya.
Abang Johari mega madahka Sarawak ngembua pengeraja asal, tanah betanam, berikan sereta mineral.
“Kami (Sarawak) ngembuan infrastruktur enggau utiliti ke moden sereta perintah ti efisien ke manah enggau bedagang,” ku iya. — DayakDaily
