KUCHING, Nov 1: Pengudah mujur numbuhka sejuta hektar kebun dandang sawit, Sarawak diatu fokus ngerembaika penyampau nya ngagai 1.5 juta hektar, pia ku Menteri Muda Pemansang Mengeri, Pengatur Tanah enggau Rampa Menua Datu Len Talif Salleh.
“Kitai diatu fokus deka nyapai 1.5 juta hektar tanah ungkup sektor kebun dandang sawit.
“Taja pan mayuh orang luar mantah pengawa kitai ngemansangka negeri nengah sektor tu tang kitai ulih teulihka pemujur ti ngemegah sereta ulih ngurangka impek ngagai rampa menua,” ku iya lebuh bejadi Seminar Pemuliharaan dan Kelestarian Alam Sekitar 2017 ditu, kemari.
Iya mega madah, industri sawit di Sarawak diiring nengah penemu ari Roundtable on Sustainable Palm Oil (RSPO).
Ba tetiap inisiatif pemansang, kita seruran berati sereta berundingka pemanah ngagai rampa menua,” ku iya.
Ngenang pasal pemanah kualiti ai, Len madahka Lembaga Sumber Asli dan Alam Sekitar (NREB) udah numbuhka program matau kualiti ai.
Sida (NREB) deka matau urung 62 sungai, tiga letung enggau empat tekat ai.
“Nya dikena nentuka ai sungai enggau letung kitai beresi kelimpah pemansut ai kitai diatur sereta diintu enggau manah,” ku iya. — DayakDaily
