KUCHING, Mac 8: Kepala Menteri, Datuk Abang Johari Tun Openg madah, Sarawak deka ngatur kediri pemansut pengeraja asal kelebih agi minyak enggau gis.
Ku iya, nya setipak enggau danji Menteri Besai, Datuk Seri Najib Tun Razak ke deka mulaika hak negeri tu ke ngelama tu enda sengaja majak lenyau.
“Menteri besai udah setuju deka mulaika hak nya ngagai negeri.
“Aku deka beterima ngagai Menteri Besai ketegal udah setuju,” ku iya.
Ku Abang Johari baru, pekara nya dipesetujunitihka perlembagaan ari baruh Lis Negeri baka ke dalam Atur Kesemilan Perlembagaan Perintah Besai.
Iya bejaku munyi nya lebuh bejaku ngelancharka Petroleum Sarawak Berhad (Petros) di Hotel Pullman ditu malam ensana.
“Pekara tu dikeamat nengah pengawa numbuhka Petroleum Sarawak Berhad (Petros) sereta neritka hak perlembagaan nya asil randau bekaul mulaika kuasa belama entara Perjntah Besai enggau Perintah Negeri,” ku iya.
Ku Kepala Menteri, Sarawak deka bulih mayuh agi penatai pemisi ari minyak, gis enggau pemansut asal bukai pengudah tu.
Tu ulih mantu melanja agenda pemansang Perintah Negeri enggau inisiatif Ekonomi Digital, ku iya. — DayakDaily
