Dikarang Chris Bishop
SIBU, Mei 16: Penyampau 440 iku peranak ari 29 rumah panjai ke diau ngelingi Sekuau di Sibu arapka Salcra ngemansang tanah NCR.
Asil ari pengarap nya, Projek Kebun Sawit Salcra Sekuau dipenyadi nengah program manggol ti dikemujur Sapit Kepala Menteri Datuk Amar Douglas Uggah Embas seharitu.
Nitihka penerang siku penyereta, Angkin Bedindang ari Rh Augustine Amin di Sekuau, sida milih Salcra ketegal ijinsi nya sigi meratka atur mantu rayat di menua pesisir.
“Kami udah ngenataika pinta kenyau ari taun 2010, diatu pengudah 8 taun nganti Salcra datai ditu.
“Seharitu kami berasai gaga, pengawa manggol projek kebun sawit ditu pan udah dikemujur.
“Nengah Salcra, untung sereta semua utai sigi deka diserah pulai ngagai orang bempu tanah,” ku iya lebuh dikerandau DayakDaily ba program penemuai Uggah di Rumah Joseph Serang ditu.
Ngenang kaul ke sama, Angkin madah berengkah diatu pengawa numbuhka sawit nya deka berengkah alai 24,000 hektar tanah NCR diak deka dikemansang Salcra.
Ku iya, tanah NCR nya udah tembu disukat kelingi raban ari Opis Tanah enggau Penyukat (JTS) nyentuk ngagai Ulu Pakoh.
“Semua kami ke ditu sigi dekaka tanah dikemansang Salcra endur nanam sawit dandang besai,” ku Angkin.
Setuju enggau penemu Angkin, Tr Ganya Ujang ari Sungai Rian, Oya madah Salcra dipilih ketegal tanah deka mengkang empu sida lalu dikemansang enggau manah.
Kelimpah ari nya ku Tr Ganya, Salcra mega deka ngaga jalai ti tau ngemudah kereja sawit sereta meri pemaik ngagai rayat.
Sempekat 25 taun enggau Salcra ku iya sigi deka ditampung baru pengudah timpuh nya ketegal ti arapka ijinsi pemansang tanah nya. — DayakDaily
