Runding entara Sarawak enggau Petronas diatu enda negu SST, ku Sharifah

Datuk Sharifah Hasidah Sayeed Aman Ghazali

KUCHING,15 Julai: Tuduh ti madah Perintah Negeri benung berunding enggau Petronas ba sentang Chukai Nyual Negeri(SST) ti diletak ba produk petroleum enda amat.

Jaku sangkal tu dipansutka Menteri Muda Undang-Undang, Kaul Perintah Besai enggau Pematau Projek Datuk Sharifah Hasidah Sayeed Aman Ghazali nengah siti penerang di Facebook iya seharitu.

Ku iya, pekara ti benung diperunding entara Perintah Sarawak enggau Petronas iya nya ba sentang pengawa komersyel lalu enda negu SST ba produk petroleum.

Sharifah Hasidah enggau nyemetak madah SST ke patut dibayar Petronas ngagai Sarawak ukai pekara ke ulih diperunding agi alai chukai nya sigi hak Sarawak nitihka konstitusyen.

“Pekara ke benung diperunding nengah Komiti Segulai ukai bekaul enggau chukai nyual.

“Petronas meseti mayar SST nitihka patut bepelasarka Ordinan Chukai Nyual Negeri. Pekara tu enda diperunding agi lalu sigi hak kitai ba konstitusyen ngeletak SST.

“Berindik enggau nya, tuduh ti madah kitai benung berundingka baru bayar SST enda amat. Sigi bebula,” ku Sharifah.

Nitihka penerang iya, Perintah Sarawak diatu benung berunding enggau Petronas ba sentang atur ngambi pulai kuasa ngelumbung minyak, nambah syer ba asil minyak enggau gis ke dipansut Sarawak, nambah peluang ba aktiviti ke bekaul ungkup Perintah Sarawak sereta Petros.

Kelimpah ari nya, runding mega mungkur atur nambah peluang ungkup kompeni ari Sarawak ngambi bagi ba industri minyak enggau gis sereta nambah penyampau bekal gis ungkup industri enggau tuju ngangkatka dagang industri ba dalam menua.

“Pekara ke diperunding diatu sigi bekaul enggau pengawa komersyel,” terang Sharifah.

Iya mansutka penerang tu ketegal ti nimbal tuduh ADUN Batu Lintang See Chee How ti udah ningkilka diri ari Komiti Konsultatif DUN.

See ningkilka diri ketegal ti mantah pengawa Perintah Sarawak ti diasaika iya enda betanya dulu ngagai komiti ba sentang rundingnya.—DayakDaily

Share this article!