Rumah Nibong nyendia konsep bebida ngagai mensia mayuh ti datai beperindang ngagai endur nya

Rumah Nibong, Kota Samarahan.

KOTA SAMARAHAN, Sept 23: Bebida enggau rumah asap bukai, Rumah Nibong di Kota Samarahan digaga ba atas bukit, nyendiaka rampa peda ke chukup manah endur belepa seraya makai ngirup enggau beperindang.

Dibuka tiga iku kaban kunsi, Radin, Justine enggau [email protected] kena Ogos 3 tu tadi, Rumah Nibong digaga ngena konsep ti bebida laban deka mulaika pengingat diau ba rumah asal ngagai tetiap iku orang ke datai beperindang ngagai endur nya.

Rumah Nibong ke tebal agi digaga ari utai asal baka daun apong, nibung enggau buluh bisi nyendiaka tiga iti palan baka ruai besai, tanju enggau palan tebuka endur mensia mayuh duduk makai ngirup sereta beperindang, pia ku pengempu palan nya lebuh dikerandau pemberita ari DayakDaily malam kemari.

[email protected] (kiba) Radin (tengah) enggau Justine, tiga iku kaban kunsi ke ngempu Rumah Nibong, Kota Samarahan.

“Rumah Nibong tu digaga ngena konsep ke bebida ari endur bukai laban kami deka meri peneleba baru sereta mulaika pengingat diau ba rumah asal ngagai bala ke datai belepa sereta beperindang ditu.

“Rumah tu digaga ari utai asal baka tiang ari nibong, alang ari buluh enggau atap digaga ngena daun apong,” pia ku Radin seduai Phiong.

Seduai mega madah, kenyau dibuka kena pun bulan Ogos tu tadi, palan tu nerima sambut ke manah ari mensia mayuh kelebih ari raban artis enggau production.

Rumah Nibong dibuka ninting hari ari pukul 4 lemai nyentuk 12 tengah malam, bisi nyual bemacham bansa pemakai asal kitai iban baka panggang babi, manuk enggau ikan, sayur babas, kasam, salai sereta pemakai eksotik.

Mensia mayuh ke benung makai ngirup ba palan tebuka Rumah Nibong.

Ku seduai, tetiap ujung minggu sida bisi ngangauka bala artis merindang mensia mayuh ke datai ngagai endur nya kelimpah bisi nyendiaka karaoke ngagai orang ti rinduka pengawa belagu.

Entara artis ke kala dikangauka sida merindang mensia mayuh dia baka Castello Jawi, EyQa Saiful, Didie K, Dino, Karen Libau, Alexander Peter enggau ke bukai.

Kelimpah nyamai alai beperindang, palan tu mega manah endur ngatur pengerami besai bukai baka melah pinang, begempuru begulai baru (reunion), ngintu hari pengada, ngelancharka album lagu enggau pengawa bukai.

Pakej pemakai ungkup pengerami ke baka mega bisi disedia laban sida ngembuan raban tukang sumai ke bisi peneleba ba pengawa nyumai.

Dapur enggau palan nyual pemakai ngagai mensia mayuh di Humah Nibong

Dikena matak penatak mensia mayuh ngagai palan tu, pengempu Humah Nibong bisi merambu deka ngatur mayuh agi aktiviti bukai dudi ila baka Pekit Belagu, Ngajat, Karaoke enggau ke bukai.

Pengempu Humah Nibong tu mega madahka sida komited nyaup ngelakuka raban artis baru, seraya madahka grup musik ke pemadu baru ‘MERGER’ deka ngelancharka album ba palan nya kena 29 Sept tu ila.

Nengah awak tu, pengempu palan tu ngarapka bansa kitai sama besukung ngangkatka bansa Dayak ngambika sama ulih nyingkang maju nitihka singkang bansa bukai, kelebih agi ba pengawa dagang.

Penerang silik pasal Humah Nibong tau ditanya ngagai Radin ba lumur 01131921176 enggau [email protected] (014 8987617). — DayakDaily